भारतमा किन घट्यो तेलहनको आयात ? सूर्यमुखी आयात ६७ % घट्दा पाम आयात ८ महीनाकै न्यून

काठमाडौं । गएको महीना भारतको पाम तेल आयात घटेको छ । फेब्रुअरी महीनाभर भारतले ५ लाखद ८६ हजार टन पाम तेल आयात गरेको छ । यो जनवरीको तुलनामा ३० प्रतिशत कम हो । आयातको यो आकार ८ महीनाकै न्यून पनि हो । अक्टोबर देखि जनवरीसम्मको अवधिमा अत्यधिक आयातका कारण इन्भेन्टरीको थुप्रो लाग्दा समीक्षा अवधिमा आयात कम भएको जनाइएको छ । भारत विश्वको सबैभन्दा ठूलो वनस्पति तेल आयातकर्ता हो । यसले मलेशियाको पाम तेलको मूल्यमा दबाब दिन सक्ने विश्लेषण गरिएको छ ।  अक्टोबरदेखि जनवरीको बीचमा भारतको पाम तेल आयात उच्च थियो । तर माग कमजोर भएपछि फेब्रुअरीमा तेल प्रशोधनकर्ताहरुले आयात घटाए । गएको महीना भट्मासको तेल आयात पनि अघिल्लो महीनाको भन्दा ७ दशमलव ३ प्रतिशतले घटेर ३ लाख ४० हाजर टनमा झरेको छ । सूर्यमुखी तेलको आयात भने १ लाख ५० हजार टन मात्रै छ । यो जनवरीको कीर्तिमानी स्तर भन्दा ६७ प्रतिशत कम हो । भारतले मुख्यतः इन्डोनेशिया, मलेशिया र थाइल्यान्डसँग पाम तेल किन्ने गरेको छ । भटमास र सूर्यमुखी तेल भने अर्जेन्टिना, ब्राजिल, रुस र युक्रेनबाट ल्याइन्छ । भटमास र सूर्यमुखी तेलको भाउ घटेसँगै अहिले पाम बजारलाई सकस भएको छ । डिसेम्बर त्रैमासमा पाम तेलको भाउ प्रति टन झन्डै ५०० डलर थियो । गएको महीना घटेर करीब २०० डलरमा आएको छ । भारतले बुधबार मात्रै अप्रिल १ देखि शुरु हुने आवका लागि २० लाख टन बराबरको कच्चा सूर्यमुखी तेलमा ड्युटी फ्रि कोटा खारेज गरेको छ । यो कदमसँगै पाम तेलको आयातले टेवा पाउने अपेक्षा पनि गरिएको छ । एजेन्सीको सहयोगमा