.jpg)
काठमाडौं । नेपाल उद्योग वाणिज्य महासंघले काठमाडौंमा रोजगार मेला आयोजना गर्ने भएको छ । महासंघले मंगलवार र बुधवार दुई दिन महासंघको सचिवालय, टेकुमा मेला आयोजना गर्ने भएको हो । मेलाको यही जेठ १६ (मंगलवार) बिहान १० बजे उद्घाटन गरिने कार्यक्रम छ ।
रोजगार मेला नेपाल सरकार श्रम रोजगार तथा सामाजिक सुरक्षा मन्त्रालय र अन्तरराष्ट्रिय श्रम संगठनको सहयोगमा आयोजना हुन लागेको बताइएको छ । मेलामा रोजगार सेवा केन्द्र एवं मेरो जबको प्राविधिक सहायता रहनेछ ।
काठमाडौं र ललितपुर महानगरपालिका, भक्तपुर नगरपालिका, महासंघका सदस्य भक्तपुर र ललितपुर उद्योग वाणिज्य संघको सहकार्य रहने आयोजकको भनाइ छ ।
कामको खोजीमा रहेका युवालाई प्रमुख कम्पनीमार्फत कामको अवसर जुटाइदिन पहल गर्ने, नयाँ अवसरको खोजी गर्न सघाउने, आवश्यक शीप पहिचानसहित युवा जनशक्तिलाई स्वदेशमै काम गर्ने वातावरण बनाउने उद्देश्यले रोजगार मेला आयोजना गर्न लागिएको हो ।
रोजगार मेलामा १०० भन्दा बढी कम्पनीको सहभागिता रहनेछ । मेला कामको खोजीमा रहेका ५ हजारभन्दा बढी युवाले अवलोकन गर्ने अनुमान छ । कार्यक्रममा रोजगारी, शीप एवं जनशक्ति विकास लगायत विषयमा विभिन्न परामर्श सत्रसमेत आयोजना हुने जानकारी दिइएको छ ।
