काठमाडौं । घोराही सिमेन्ट इण्डष्ट्री लिमिटेडले गत आर्थिक वर्ष ०७९/८० को मुनाफाबाट १५ प्रतिशत बोनस शेयर वितरण गर्ने भएको छ । पुस ५ गते बसेको कम्पनीको सञ्चालक समितिको बैठकले हाल कायम चुक्तापूँजी ३ अर्ब ९७ करोड १९ लाख रूपैयाँको आधारमा १५ प्रतिशत बोनस शेयर वितरण गर्ने निर्णय गरेको हो ।
प्रस्तावित बोनस शेयर सहित अन्य विविध प्रस्ताव पारितका लागि पुस २८ गते कम्पनीले तेस्रो वार्षिक साधारण सभा बोलाएको छ । होटल पौवा, दाङमा विहान ९ बजे सभा गर्ने निर्णय गरेको छ । सभाले बोनस प्रस्तावसँगै गत आर्थिक वर्षको वार्षिक प्रतिवेदन सहितका वित्तीय विवरणहरू पारित गर्नुका साथै चालू आर्थिक वर्षको लागि लेखापरिक्षक नियुक्ती र निजको पारिश्रमिक निर्धारणको विषय टुङ्ग्याउनेछ ।
सञ्चालक नियुक्ती अनुमोदनको प्रस्ताव पारित गर्दै स्वतन्त्र संचालक नियुक्ती र सर्वसारणतर्फबाट प्रतिनिधित्व गर्ने सञ्चालकको निर्वाचन गर्ने गर्ने कार्यक्रम पनि सभाका लागि तय भएको छ । साधारण सभा प्रयोजनका लागि कम्पनीले पुस १६ गते एक दिन बुक क्लोज गर्ने निर्णय कम्पनीले गरेको छ । बुक क्लोजको आधारमा पुस १५ गतेसम्म कायम शेयधरनीहरूले मात्र सभामा भाग लिन र लाभांश प्राप्त गर्न सक्नेछन् ।
