काठमाडौं । ‘स्ट्याण्डर्ड चार्टर्ड न्यूबिज बिजनेश वुमन समिट एण्ड अवाड्र्स’अन्तर्गत दुई महिला उद्यमीले उद्यम यात्रा कथा सुनाउने कार्यक्रम सम्पन्न भएको छ । सोमवार ललितपुरको सेन्टर फर लिडरसिप एण्ड आन्त्रप्रेनरसिपमा आयोजित ‘नियात्रा– शी ओडिसी’ नामको कार्यक्रममा बसुमाया तामाङ र सेवा पाठकले आफ्ना उद्यम यात्रा कथा सुनाएका थिए । तामाङ नेपाली मन उद्योगकी सञ्चालक र पाठक भायानेट कम्यूनिकेशन्स प्रालिकी प्रमुख कार्यकारी अधिकृत (सीईओ) हुन् ।
नेपालमै पाइने टिमुरको छोप (अचार) उत्पादन गरी विश्वका विभिन्न मुलुकमा पठाउन सफल तामाङले यो अवस्थासम्म आइपुग्दा भोगेका अनुभव सुनाइन् । उनले खोलाको बालुवा बोकेर गुजारा चलाएकोदेखि मैनबत्ती बनाएकोसम्म कथा सुनाइन् । टिमुरको अचार बनाउन थाल्नुअघि उनले ठेलामा व्यापार गरेकोसमेत बताइन् । हाल उनको उद्योगमा ९० जना महिलाले काम गर्छन् । बेलायतमा शाखा विस्तार गरिसकेकी तामाङले चाँडै दुबईमा पनि शाखा खोल्ने तयारी भइरहेको जानकारी गराइन् । ‘जस्तोसुकै परिस्थिति आउँदा पनि हरेस नखाई संघर्ष गर्दा आज यो अवस्थामा आइपुगेकी छु,’ कथा सुनाउने कार्यक्रममा उनले भनिन् । उद्योगमा आउन चाहने महिलालाई अरूले गरिरहेको भन्दा फरक किसिमको काम गर्न सुझाइन् ।
सोही कार्यक्रममा बोल्दै भायानेटकी सीईओ पाठकले चार्टर्ड एकाउन्टेन्ट भएपछि शुरूका दिन शिखर इन्स्योरेन्समा फाइनान्स मेनेजरमा काम गरेको अनुभव सुनाइन् । केही समयपछि श्रीमान्को कम्पनी भायानेटमा काम गर्न थालेको बताइन् । ‘फाइबर टू द होम’ प्रविधि आएपछि त्यसको कार्यान्वयनका लागि कम्पनीमा पूर्ण रूपमा काम गरेको उनको भनाइ छ । समयक्रममा कम्पनीको प्रमुख कार्यकारी अधिकृतको भूमिकामा काम गर्न थालेको बताइन् ।
उनले विभिन्न बैंकमा कर्जाका लागि व्यावसायिक योजना बनाएर पेश गर्दा आफूलाई भन्दा श्रीमान्लाई मात्र व्यावासायिक प्रश्न गर्ने गरेको बताइन् । उनी थप्छिन्, ‘महिलालाई पत्याउने वातावरण अझै बनेको छैन ।’ आफ्नो मानसिकतामाथि विजय गर्न सकेमात्र व्यवसायमा विजय हासिल गर्न सकिने अनुभव उनको छ ।
पारिवारिक र व्यावसायिक जिम्मेवारी दुवैलाई एकसाथ अघि बढाउन जो कोहीलाई समस्या हुन्छ । यो अवस्थामा प्राथमिकताका आधारमा समय दिन सके सफल बन्न सकिने धारणा पाठकको छ ।
कार्यक्रममा सेन्टर फर लिडरसिप एण्ड आन्त्रप्रेनरसिपका एकेडेमिक डाइरेक्टर विजयआनन्द शर्मा तिमिल्सिनाले स्वागत मन्तव्य राखेका थिए । न्यू बिजनेश एजका अध्यक्ष तथा प्रधानसम्पादक मदन लम्सालले कार्यक्रमबारे प्रकाश पारेका थिए । कार्यक्रममा विभिन्न प्रोफेशनल र महिला उद्यमीको सहभागिता थियो ।
अन्तिम कार्यक्रम वैशाख ९ गते काठमाडौंमा हुने समिट एण्ड अवार्डस्को मुख्य प्रयोजक स्ट्याण्डर्ड चार्टर्ड बैंक र सहप्रायोजक मुक्तिनाथ विकास बैंक लिमिटेड छन् । मेडिकल पार्टनर स्टार हस्पिटल, नलेज पार्टनर सेन्टर फर लिडरसिप एण्ड आन्त्रप्रेनरसिप, एयरलाइन्स पार्टनर टर्किस एयरलाइन्स, इकमर्श पार्टनर दराज, ननलाइफ इन्स्योरेन्स पार्टनर नेको इन्सुरेन्स लिमिटेड, इन्टरनेट पार्टनर डिसहोम फाइबर नेट छन् ।
यो कार्यक्रमलाई कृषि विकास बैंक, सिप्रदी, रिलायबल लाइफ इन्स्योरेन्स, प्रोग्रेसिभ फाइनान्स लिमिटेड, नेशनल लाइफ इन्सोरेन्स, नेपाल महिला उद्यमी महासंघ, नेपाल उद्योग वाणिज्य महासंघ र नेपाल राष्ट्र बैंकले पनि सहयोग गरेका छन् ।
न्यू बिजनेश एजले विगतमा पनि उद्योग व्यवसाय र उद्यमशीलताको प्रवर्द्धनमा सघाउने विभिन्न कार्यक्रम गर्दै आएको छ । महिला उद्यमीलाई सम्मान गर्ने यस्तै कार्यक्रम गत वर्ष जनवरी ३१ मा सम्पन्न भएको थियो ।
.jpg)
