वैशाख १३, काठमाडौं । आइसीएफसी फाइनान्स लिमिटेडले चालू आवको तेस्रो त्रैमासीक वित्तीय विवरण सोमवार सार्वजनिक गरेको छ ।
उक्त वित्तीय विवरण अनुसार कम्पनीले चालू आवको तेस्रो त्रैमासमा रू. १७ करोड २९ लाख नाफा कमाएको छ । यो नाफा गत आवको तेस्रो त्रैमासको तुलनामा ६५ प्रतिशतले वृद्धि भएको हो । गत आवको तेस्रो त्रैमासमा कम्पनीले रू. १० करोड ७३ लाख नाफा कमाएको थियो ।
चालू आवको तेस्रो त्रैमासमा कम्पनीको सञ्चालन नाफामा वृद्धि भएसँगै नाफा बढेको हो । सो अवधिमा कम्पनीको वितरणयोग्य नाफा रू. १० करोड ३० लाख रहेको छ । एनएफआरएस प्रणाली अनुसार कम्पनीले आर्जन गरेको नाफालाई विभिन्न शिर्षकमा छुट्याएपछिको नाफानै वितरणयोग्य नाफा हो ।
चुक्तापूँजी रू. १ अर्ब २२ करोड ४२ लाख रहेको कम्पनीले जगेडा कोषमा रू. ३४ करोड ३६ लाख र रिटेन्ड अर्निङमा रू.१० करोड ३० लाख सञ्चित गरेको छ । नाफामा वृद्धि भएसँगै प्रतिशेयर आम्दानीमा पनि वृद्धि भएको छ ।
गत आवको तेस्रो त्रैमासमा कम्पनीको प्रतिशेयर आम्दानी रू.१५ दशमलव ४५ रहेकोमा चालू आवको सोही अवधिमा वृद्धि भएर रू. २३ दशमलव १६ पुगेको हो । कम्पनीको मूल्य आम्दानी अनुपात १४ शदमलव ५० गुणा र प्रतिशेयर नेटवर्थ रू. १३८ दशमलव १७ रहेको छ ।
