चिरख्वा हाइड्रोपावरको आईपीओ भोलिदेखि, कस्तो छ कम्पनीको समग्र अवस्था ?

काठमाडौं । चिरख्वा हाइड्रोपावर लिमिटेडले भोलि (मंगलवार)देखि सर्वसाधारणका लागि आईपीओ निष्कासन गर्ने भएको छ । कम्पनीले पहिलो चरणमा आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूका लागि आईपीओ बाँडफाँटपछि अब सर्वसाधारणका लागि आईपीओ निष्कासन गर्न लागेको हो ।  कम्पनीले जारी पूँजी ४० करोड रुपैयाँको ३० प्रतिशत अर्थात् १२ लाख कित्ता आईपीओ निष्कासन गर्न सेबोनबाट अनुमति पाएको हो । कुल कित्तामध्ये आयोजना प्रभावित स्थानीयमा २ लाख ४ हजार ७०० कित्ता, वैदेशिक रोजगारीमा रहेका नेपालीमा ८० हजार कित्ता, सामूहिक लगानीकोषका लागि ४० हजार र कर्मचारीहरूमा १६ हजार कित्ता आईपीओ बाँडफाँट गरिएको हो । स्थानीयका लागि छुट्याइएको ४ लाख कित्ता शेयरमध्ये विक्री हुन नसकेको १ लाख ९५ हजार ३०० कित्ता आईपीओसमेत गरेर ८ लाख ५९ हजार ३०० कित्ता आईपीओ सर्वसाधारणमा निष्कासन गर्न लागिएको हो ।  यो आईपीओ खरीदका लागि न्यूनतम १० कित्तादेखि अधिकतम १ लाख कित्तासम्म माग गर्न सकिने व्यवस्था छ । प्रतिशेयर सय रुपैयाँ मूल्यमै कम्पनीले आईपीओ विक्री गर्न लागेको हो । यो आईपीओ छिटोमा असोज २६ गतेसम्म विक्रीमा रहनेछ । सो अवधिसम्म मागबमोजिम आवेदन नपरेमा ढिलो अवधि कात्तिक ३ गतेसम्म विक्री लम्बिनेछ । तर, पछिल्लो समय सर्वसाधारणमा आईपीओ विक्रीमा आउँदा पहिलो दिनमै मागभन्दा बढी आवेदन पर्दै आएकाले यस कम्पनीको आईपीओसमेत छिटो अवधि असोज २६ गतेसम्म मात्र विक्रीमा रहने निश्चितजस्तै छ । आईपीओ निष्कासनको लागि गराएको रेटिङ्गमा ईक्रा नेपालले कम्पनीलाई ईक्रा एनपी इस्यूअर डबल बी माइनस रेटिङ्ग प्रदान गरेको छ । यो रेटिङ्गले कम्पनीको दायित्व वहन गर्ने क्षमतामा औसत जोखिम रहेको संकेत गर्दछ । कम्पनीले पाएको रेटिङ्गलाई ध्यानमा राखेर पनि लगानीको धारणा बनाउन सकिनेछ । ईक्रा नेपालले केयर एनपी त्रिपल ए देखि केयर एनपी डि सम्मको रेटिङ प्रदान गर्दछ । केयरएनपी त्रिपल ए इस्युरअर रेटिङ्गले बलियो आधारको संकेत गर्दछ भने केयर एनपी डि इस्युरअर रेटिङ्गले कमजोर आधारको संकेत गर्दछ । कम्पनीको आईपीओ निष्कासन तथा विक्री प्रबन्धकमा आरबिबि मर्चेन्ट बैंकिङ्ग लिमिटेड छ । विक्री प्रबन्धसँगै लगानीकर्ताले नेपाल धितोपत्र बोर्डबाट स्वीकृतिप्राप्त गरेका सम्पूर्ण सि–आस्बा सदस्य बैंक तथा वित्तीय संस्था र तिनका तोकिएका शाखा कार्यालयबाट आवेदन दिन सक्नेछन् । साथै मेरो शेयर अनलाइनमार्फत समेत आवेदन दिन सकिनेछ । कम्पनीको परिचय यो कम्पनी २०६५ पुस २७ गते कम्पनी रजिष्टर्ड कार्यालयमा 'चिरख्वा हाइड्रोपावर प्राइभेट लिमिटेड'को नाममा दर्ता भएको थियो । त्यसको ११ वर्षपछि (२०७६ असार २५ गते) यो कम्पनी 'चिरख्वा हाइड्रोपावर  लिमिटेड'मा परिणत भएको हो । कम्पनीको रजिष्टर्ड कार्यालय काठमाडौंको घट्टेकुलोमा छ । कम्पनीले भोजपुरमा ४ दशमलव ७ मेगावाट क्षमताको माथिल्लो चिरख्वा जलविद्युत आयोजना निर्माण गरिरहेको छ ।  आयोजनाको कुल अनुमानित लागत ९९ करोड ८० लाख रुपैयाँ छ भने प्रतिमेगावाट कुल अनुमानित लागत २१ करोड २३ लाख ४० हजार ४२६ रुपैयाँ छ ।  पूँजी संरचना  अधिकृत पूँजी ४० करोड रुपैयाँ रहेको कम्पनीको जारी पूँजी ४० करोड रुपैयाँ नै छ । हाल संस्थापक शेयरधनीहरूबाट चुक्ता भएको पूँजी २८ करोड रुपैयाँ मात्र छ । आयोजना प्रभावित स्थानीयसहित सर्वसाधारणमा आईपीओ बाँडफाँटपछि कम्पनीको चुक्ता पूँजी ४० करोड रुपैयाँ कायम हुनेछ । कुल चुक्ता पूँजीमा संस्थापकतर्फ ७० प्रतिशत र स्थानीय बासिन्दासहित सर्वसाधारणमा ३० प्रतिशत शेयर स्वामित्व कायम हुनेछ । वित्तीय अवस्था आर्थिक वर्ष ०७८/७९ सम्मको वास्तविक वित्तीय विवरण अनुसार कम्पनी १४ हजार २६७ रुपैयाँ सञ्चित नाफामा छ । आर्थिक वर्ष ०७९/८० को अन्त्यसम्म भने कम्पनीले ८२ लाख ९५  हजार रुपैयाँभन्दा बढी नाफा गर्ने प्रक्षेपण गरेको छ । आर्थिक वर्ष ०७८/७९ सम्मको वित्तीय विवरण अनुसार कम्पनीको प्रतिशेयर नेटवर्थ १ सय रुपैयाँ १ पैसा छ । त्यस्तै कम्पनीले आर्थिक वर्ष २०८०/८१ को अन्त्यसम्ममा भने २ करोड ७१ लाख रुपैयाँ नाफा कमाउने प्रक्षेपण गरेको छ ।  कति पाउला ओपन रेञ्ज ? कम्पनीले यो आईपीओ कारोबारका लागि धितोपत्र दोस्रो बजार नेपाल स्टक एक्सचेञ्ज (नेप्से) मा सूचीकृत गराउनेछ । सूचीकृत भएको दोस्रो कारोबार दिनदेखि कम्पनीको आईपीओ कारोबारमा आउनेछ । कम्पनीको आईपीओको पहिलो कारोबार मूल्य भने नेप्सेले निर्धारण गर्नेछ ।नेप्सेले कम्पनीको वास्तविक प्रतिशेयर नेटवर्थको आधारमा तीन गुणासम्मको मूल्य रेञ्ज तोक्नेछ । यसआधारमा कम्पनीले पहिलो कारोबारका लागि न्यूनतम प्रतिकित्ता १ सय रुपैयाँ १ पैसादेखि अधिकतम प्रतिकित्ता ३ सय रुपैयाँ ३ पैसासम्मको मूल्य रेञ्ज पाउने देखिन्छ । कम्पनीको पहिलो कारोबारपछिको मूल्य भने बजारमा लगानीकर्ताको माग र आपूर्तिका आधारमा निर्धारण हुनेछ ।