जेठ १९, काठमाडौं । गत मे महीनामा त्रिभुवन अन्तरराष्ट्रिय विमानस्थल कार्यालय हुँदै १२ हजार जना नेपाल भित्रिएका छन् ।
अध्यागमन विभागले सार्वजनिक गरेको मे महीनाको तथ्यांक अनुसार १२ हजार ४०० जना नेपाल भित्रिएका हुन् । जसमा १ हजार ४६८ जना विदेशी नागरिक र १० हजार ९३२ जना नेपाली नागरिक स्वदेश भित्रिएका छन् ।
गत मेमा नेपाल भित्रनेभन्दा बाहिरिनेको तथ्यांक दोब्बर छ । सो अवधिमा २३ हजार १३५ बाहिरिएका छन् । बाहिरिनेमध्ये नौ हजार ९७७ विदेशी र १३ हजार १५८ जना नेपाली छन् । अन्य महीनाको तुलनामा मेमा कम सङ्ख्यामा विदेशी नेपाल भित्रिएका छन् ।
कोरोना महामारी र लामो समयको बन्दाबन्दीपछि नेपालमा सबैभन्दा धेरै पर्यटक अप्रिलमा नेपाल भित्रिएका थिए ।
विभागको तथ्यांक अनुसार अप्रिलमा १४४ ओटा देशबाट २२ हजार ४५० जना विदेशी नेपाल भित्रिएका थिए । यस्तै, गत अप्रिलमा त्रिभुवन अन्तरराष्ट्रिय विमानस्थल हुँदै ५१ हजार ७७५ नेपाली विदेशिएका छन् । रासस
