जेठ ५, काठमाडौं । नेपालको शेयर बजारले बुधवार पनि कारोबार रकममा रेकर्ड कायम गरेको छ ।
मंगलवारको रू. ११ अर्ब ३५ करोड ९३ लाख ६० हजारको उच्च कारोबार रकमको रेकर्डलाई तोड्दै बुधवार रू. ११ अर्ब ९५ करोड ८० लाख ९७ हजार बराबरको शेयर कारोबार भएको हो ।
मंगलवार २१५ ओटा कम्पनीको १ लाख १५ हजार ९६१ पटकको व्यापारमा २ करोड ३१ लाख ३१ हजार ६१५ कित्ता शेयर कारोबार भएको थियो । बुधवार भने २१४ ओटा कम्पनीको १ लाख ३२ हजार ३६९ पटकको व्यापारमा २ करोड ५१ लाख २१ हजार ५५४ कित्ता शेयर कारोबार भएको हो ।
बुधवार पनि कुल कारोबार रकममा सर्वाधिक हिस्सा नेपाल पुनर्बीमा कम्पनीलेनै ओगटेको छ । यस कम्पनीले पछिल्लो केहि दिन यता सर्वाधिक रकमको कारोबारको हिस्सालाई ओगट्दै आएको छ ।
बुधवार नेपाल पुनर्बीमा कम्पनीको रू. ५५ करोड ६९ लाख १८ हजार बराबरको शेयर कारोबार भएको हो । यो दिन कम्पनीको शेयरमूल्य भने प्रतिकित्ता रू. ३७ ले घटेर अन्तिम मूल्य रू. १ हजार ६५६ कायम भएको छ ।
कारोबार रकमले ऐतिहासिक रेकर्ड कायम गरिरहँदा बुधवार नेप्से परिसूचक भने १३ दशमलव शून्य ९ अंक अर्थात् शून्य दशमलव ४७ प्रतिशतले घटेको छ । यो दिन नेप्से परिसूचक २ हजार ७८० दशमलव ८१ विन्दुमा झरेको हो । गत साताको दोस्रो कारोबार दिनदेखि निरन्तर बढेको बजारमा नाफा बुक गर्नेहरु हाबी हुँदा करेक्सन आएको लगानीकर्ताहरु बताउँछन् ।
यो दिन सेन्सेटिभ इन्डेक्स १ दशमलव शून्य ८ अंकले घटेर ४९६ दशमलव १४ विन्दुमा झरेको छ । यस दिन कारोबारमा आएका २१४ ओटा कम्पनीमध्ये पाँच ओटा कम्पनीको शेयर मूल्य सर्किट लेबलमा वृद्धि भएको छ ।
सबैभन्दा बढी समता घरेलु लघुवित्त वित्तीय संस्थाको शेयर मूल्य अघिल्लो कारोबार दिनको तुलनामा ९ दशमलव ९९ प्रतिशतले वृद्धि भएको हो । शेयरमूल्य प्रतिकित्ता रू. १ हजार ७०६ पुगेको छ ।
त्यसैगरी रू रू जलविद्युत् परियोजनाको शेयर मूल्य अघिल्लो कारोबार दिनको तुलनामा ९ दशमलव ९६ प्रतिशत, गोर्खाज फाइनान्सको ९ दशमलव ९३ प्रतिशत, नेपाल फाइनाान्सको ९ दशमलव ८२ प्रतिशत र कर्णाली डेभलपमेण्ट बैंकको शेयर मूल्य ९ दशमलव ६२ प्रतिशतले वृद्धि भएको हो ।
त्यसैगरी सबैभन्दा बढी शेयर मूल्य ङादी ग्रुप पावर कम्पनीको गिरावट आएको छ । कम्पनीको शेयर मूल्य अघिल्लो करोबार दिनको तुलनामा ६ दशमलव ८८ प्रतिशतले कमि आएको छ । शेयर मूल्य प्रतिकित्ता रू. ३२५ मा झरेको हो ।
बुधवार कारोबारमा आएका १३ ओटा समूहमध्ये बैंकिङग समूहको परिसूचक शून्य दशमलव ४ प्रतिशत, व्यापार समूहको शून्य दशमलव ८६ प्रतिशत,होटल एण्ड टुरिजम समूहको शून्य दशमलव १४ प्रतिशत,वित्त समूहको परिसूचक शून्य दशमलव १३ प्रतिशत र म्युचुअल फण्ड समूहको परिसूचक शून्य दशलमव ५१ प्रतिशतले बढेको छ भने बाँकी समूहको परिसूचक घटेको हो । सबैभन्दा बढी जलविद्युत समूहको परिसूचक घटेको छ ।
यस समूहको २ दशमलव ११ प्रतिशतले घटेको हो। बजार बढ्दा अधिकाशं जलविद्युत कम्पनीहरुको शेयर मूल्य सर्किट लेबलमा वृद्धि हुँदै आएको थियो । पुन : लगानीकर्ताले नाफा बुक गर्न लागेकाले उक्त समूहको परिसूचक घटेको हो ।
बुधवारको बजार कारोबारीहरुले नाफा बुक गर्दा केहि प्रभावित भएको छ भने कारोबार रकमले भने राम्रो सपोर्ट गरेको देखिन्छ ।
