विराटनगर (अस) । काँकरभिट्टामा नवनिर्मित ‘हेल्थ हेल्प डेस्क’ सञ्चालनमा आएको छ । सुविधासम्पन्न र बेडसहितको डेस्कको नगर प्रमुख विमल आचार्यले बुधवार उद्घाटन गरेसँगै सञ्चालनमा आएको नगरपालिकाको स्वास्थ्य शाखाले बताएको छ ।
सबै सीमाक्षेत्रमा स्वास्थ्य चेकजाँच गर्न नेपाल सरकारले धेरै वर्षदेखि स्वास्थ्य केन्द्र, चौकीहरू स्थापना गरेको भन्दै नगर प्रमुख आचार्यले औलो, कालज्वरो, दादुरा, पोलिया लगायत रोकथामका लागि यस्ता संरचना तयार गरिएको बताए । अहिले कोभिड १९ को ‘ओमिक्रोन’ भेरियन्टको संक्रमण सीमावर्ती बजारमा देखिएकाले त्यसको नियन्त्रणका लागि चिकित्सक र अन्य प्राविधिकसहितको टोलीको व्यवस्था गरिएको उनले बताए ।
उक्त नाकाबाट आवत–जावत गर्नेहरूका लागि एकद्वार प्रणाली अवलम्बन गर्न समेत नगरप्रमुख आचार्यले मेची भन्सार कार्यालय, इलाका प्रहरी कार्यालय र सशस्त्र प्रहरी बल नेपाल (बीओपी काँकरभिट्टा)को ध्यानाकर्षण गराए । सुरक्षा, राजस्व चुहावट, विभिन्न आपराधिक गतिविधिका हिसाबले जाने र आउने अलग अलग बाटो प्रयोग गर्न आवश्यक रहेको उनको भनाइ छ ।
उपप्रमुख मीना पोखरेल उप्रेतीले विभिन्न समयमा आउने विभिन्नखाले महामारी रोग नियन्त्रणमा नगरका सरोकारवाला सबैको साथ र सहकार्य हुनुपर्नेमा जोड दिइन् । डेस्कमा बेडको पनि व्यवस्था रहेकाले अन्य खालका बिरामीले समेत प्राथमिक उपचार प्राप्त गर्न सक्ने उनको भनाइ । नगरपालिकाले यहीँबाट कोभिड १९ विरुद्घको खोप समेत उपलब्ध गराउने जानकारी उनले दिइन् ।
मेचीनगर–६ का वडाध्यक्ष ललितबहादुर तामाङको अध्यक्षतामा भएको कार्यक्रममा नगरपालिकाका प्रमुख प्रशासकीय अधिकृत खेमराज ओझा, जनता समाजवादी पार्टी नेपालका केन्द्रीय सदस्य धनप्रसाद गुरुङ, मेची भन्सार कार्यालय काँकरभिट्टाका प्रमुख भन्सार अधिकृत केशवराज ओली, इलाका प्रहरी कार्यालय काँकरभिट्टाका प्रमुख प्रहरी नायव उपरीक्षक सुनील दाहाल, सशस्त्र प्रहरी बल नेपाल, बीओपी काँकरभिट्टाका प्रमुख सशस्त्र प्रहरी निरीक्षक प्रेम राई, विभिन्न दल, संघसंस्थाका प्रमुख प्रतिनिधिसहित उद्योगी, व्यवसायी लगायतको सहभागिता थियो ।
हेल्थ हेल्प डेस्क स्थापनाका लागि मेचीनगर नगरपालिकाको पहलमा नेपाल सरकार स्वास्थ्य जनसंख्या मन्त्रालय, स्वास्थ्य सेवा विभाग इपिडेमियोलोजी तथा रोग नियन्त्रण महाशाखाको करीब ५० लाख रुपैयाँ विनियोजन गरेको थियो ।
