असार २३, बागलुङ । गए रातिदेखि परेको अविरल वर्षापछि आएको बाढीले बगाउँदा बागलुङ जिल्लाको ताराखोला गाउँपालिकामा एक युवा बेपत्ता भएका छन् ।
लेदोसहितको बाढीले बगाउँदा ताराखोला गाउँपालिका–१ हिलस्थित घुस्मेलीका १८ वर्षीय राजेन्द्र कार्की बेपत्ता भएको प्रहरी चौकी ताराखोलाका प्रमुख राजेन्द्र न्यौपानेले बताए ।
बाढीले खोला छेउमा रहेको बाख्रा फार्म बगाउन थालेपछि रातको समयमा जोगाउन फर्ममा पुगेको बेला कार्कीलाई बगाएको प्रहरी चौकी ताराखोलाका प्रमुख न्यौपानेले बताए । न्यौपानेले बाढीले ४१ ओटा बाख्रा पनि बगाएको बताए ।
पहिरो र बाढीले स्थानीय ध्रुव खत्रीले सञ्चालन गरेको एक रेष्टुरेन्ट समेत बगाएको छ । बाढीसँगै खोलामा पानीको बहाब बढेर घुस्मेली बजार क्षेत्रमा पस्न थालेपछि बजार क्षेत्रका २५ घर परिवारलाइ राति नै सुरक्षित स्थानमा सारिएको छ । स्थानीय र प्रहरीले बेपत्ता कार्कीको खोजी गरिरहेको प्रमुख न्यौपानेले बताए ।
