चैत २८, पेचिङ (चीन) । अन्तरराष्ट्रिय बजारमा सोमवार कच्चा तेलको भाउ घटेर प्रतिब्यारेल १०० डलरभन्दा तल आएको छ ।
चीनले कोरोना भाइरसको संक्रमण नियन्त्रण गर्न लगाएको बन्दाबन्दी र अन्तरराष्ट्रिय ऊर्जा निकाय (आईईए) का सदस्य देशहरुले आफ्नो रणनीतिक भण्डारबाट कच्चा तेल र तेलजन्य प्रडक्ट झिक्ने योजना बनाएपछि तेलको भाउ चार डलरभन्दा धेरैले घटेको हो ।
लन्डनस्थित आईसीईको कोमेक्स डिभिजनमा ब्रेन्ट क्रुडको भाउ सोमवार प्रतिब्यारेल ४ दशमलव शून्य ९ प्रतिशतले घटेर ९८ डलर ५९ सेन्टमा आएको छ । यो अघिल्लो दिन कोमेक्स बन्द हुँदाको तुलनामा चार डलर २० सेन्ट कम हो ।
न्यूयोर्क मर्कन्टाइल एक्सचेञ्जको कोमक्स डिभिजनमा सोमवार वेष्ट टेक्सास इन्टरमिडियट (डब्ल्यूटीआई) को भाउ ४ दशमलव ३ प्रतिशतले घटेर प्रतिब्यारेल ९४ डलर शून्य ७ सेन्टमा आएको थियो । यो पनि अघिल्लो दिनको तुलनामा ४ डलर १९ सेन्ट कम हो ।
रणनीतिक भण्डारबाट तेल झिक्ने सरकारहरुको निर्णयले आगामी महीना बजारमा देखिन सक्ने कसिलो आपूर्ति घटाउन मद्दत गर्ने र यसले निकट भविष्यमा मूल्य नियन्त्रण गर्ने विश्लेषण गरिएको छ ।
आईईएका सदस्य देशहरुले आगामी छ महीनामा ६ करोड ब्यारेल तेल भण्डारबाटबाट झिक्दै छन् । अमेरिकाले यस अवधिमा १८ करोड ब्यारेल कच्चा तेल निकाल्दैछ । छ महीनामा रणनीतिक भन्डारबाट दैनिक १३ लाख ब्यारेल तेल बजारमा आउने छ ।
यो रुसले युक्रेनमाथि आक्रमण गरेपछि रुसमाथि लगाइएको प्रतिबन्धका कारण रुसी आपूर्तिमा आएको दैनिक १० लाख ब्यारेलको अभाव भर्पाई गर्न पर्याप्त हुनेछ ।
अहिले चीनमा कोरोना भाइरसको संक्रामक प्रकार ओमिक्रोनका कारण साङ्हाईसमेत कयौं शहरमा संक्रमण बल्झिरहेको छ । ती क्षेत्रबाट संक्रमण अन्य शहरहरुमा पनि फैलिने र चीनको शून्य कोभिडको नीतिअनुसार थप क्षेत्रबाट बन्दाबन्दी भएर औद्योगिक उत्पादन र घरेलु खपतमा नकारात्मक प्रभाव पर्ने चिन्ता पछिल्लो समय उत्पन्न भएको छ । एजेन्सी
