चैत ९, काठमाडौं । प्रहरीले बैंकिङ कसूरमा दोषी ठहर भई जरिवाना र कैद सजाय तोकिए पछि फरार रहँदै आएका एक जना अभियुक्तलाई बुधवार पक्राउ गरेको छ । काठमाडौँको भीमसेनगोलाबाट पक्राउ गरेको छ ।
उच्च अदालत पाटनबाट बैंकिङ कसूर तथा सजाय ऐन २०६४ बमोजिमको कसूरमा ३६ लाख रुपैयाँ जरिवाना र ७ दिन कैद हुने ठहरपछि फरार रहेका काठमाडौंको क्षेत्रपाटी बस्ने ३८ वर्षका रगुन खड्केलाई पक्राउ गरिएको हो ।
उनले पीडितलाई न्यूरोडको महालक्ष्मी विकास बैंंकको खाताबाट रकम भुक्तान हुने भनी चेक दिएका थिए । उक्त बैंक खातामा पर्याप्त मौज्दात रकम नहुँदा पनि झुक्यानमा पारी चेक दिएका थिए । उक्त चेकमार्फत भुक्तानी हुन नसकेको ठहर गर्दै अदालतले गत वर्ष उक्त जरिवाना र कैद सुनाएको थियो ।
त्यसपछि फरार हुँदै आएका उनलाई प्रहरीको केन्द्रीय अनुसन्धान ब्यूरोको टोलिले पक्राउ गरेको हो । अभियुक्तलाई फैसला कार्यान्वयनका लागि काठमाडौं जिल्ला अदालतमा पेस गरिएको प्रहरीले बताएको छ ।
