होर्डिङ बोर्डको नियमन

चुनावी प्रचारप्रसारमा विज्ञापन बोर्डको ध्यानाकर्षण

काठमाडौं (अस) । विज्ञापन बोर्डले आसन्न स्थानीय तहको निर्वाचनको प्रचारप्रसारमा आफ्नो ध्यानाकर्षण भएको बताएको छ । निर्वाचनमा राजनीतिक दल, दलका उम्मेदवारले आमसञ्चार माध्यम तथा सामाजिक सञ्जालमा गरेको प्रचार निर्वाचन आचारसंहिता २०७८, विज्ञापन नियमन गर्ने ऐन २०७६ तथा नियमावली २०७८ अनुसार भए/नभएको अनुगमन गरिएको बोर्डद्वारा शुक्रवार जारी विज्ञप्तिमा उल्लेख छ । ‘निर्वाचन नजिकिँदै गर्दा विभिन्न माध्यमबाट भएका प्रचारप्रसारमा निर्वाचन आचारसंहिता उल्लंघन भएका घटना दिन प्रतिदिन बढ्दै गएको हुँदा विज्ञापन बोर्डको ध्यानाकर्षण भएको छ,’ विज्ञप्तिमा भनिएको छ । बोर्डले निर्वाचनको समयमा राजनीतिक दल, दलका उम्मेदवार र अन्य उम्मेदवारलाई सार्वजनिक स्थानमा होर्डिङ बोर्ड नराख्न अनुरोध गरेको छ । साथै भित्तेलेखन, पर्चा, पम्प्लेट, पोस्टर टाँस गरेको पाइएको भन्दै बोर्ड निर्वाचन आचार संहिता विपरीतका त्यस्ता कार्य नगर्न/नगराउन आग्रह गरेको छ । यसैगरी राजनीतिक दल वा उम्मेदवारको निर्वाचन चिह्न अंकित ज्याकेट, कमिज, भेस्ट, टी–शर्ट, टोपी लगायत सांकेतिक सामग्री लगाएर प्रचारप्रसार गरेको पाइएकाले त्यस्ता कार्य समेत नगर्न भनिएको छ । बोर्डले फेसबुक जस्ता सामाजिक सञ्जालमा उम्मेदवारको तस्वीर र चुनाव चिह्न फरक–फरक गरी प्रकाशन नगर्न र उम्मेदवारको फोटो बिगारेर होच्याउने, अपमान नगर्न तथा गलत, भ्रामक प्रचारप्रसार नगर्न आग्रह गरेको छ ।