पुस मसान्तसम्ममा सिद्धार्थ व्यवस्थित लगानी योजनाको सूचीकृत शेयरमा लगानी ८५% बढ्यो

माघ १२, काठमाडौं । सिद्धार्थ म्युचुअल फण्ड अन्तर्गत सञ्चालित सिद्धार्थ व्यवस्थित लगानी योजनाले पुस मसान्तको खुद सम्पत्ति मूल्य विवरण बुधवार सार्वजनिक गरेको छ ।  उक्त वित्तीय विवरण अनुसार फण्डको सूचीकृत शेयरमा लगानी मंसिर मसान्तको तुलनामा पुस मसान्तमा ८५ प्रतिशत वृद्धि भएको छ । फण्डले मंसिर मसान्तसम्ममा सूचीकृत शेयरमा रू. ७ करोड ९७ लाख ५८ हजार लगानी गरेकोमा पुस मसान्तमा वृद्धि भएर रू. १४ करोड ७९ लाख १५ हजार पुगेको हो । पुस मसान्तसम्ममा फण्डले लगानी गरेका कम्पनीहरुको शेयर मूल्यमा वृद्धि भएसँगै समग्र सूचीकृत शेयरमा लगानी बढेको हो । त्यसैगरी फण्डको एनएभी पनि वृद्धि भएको छ । मंसिर मसान्तसम्ममा फण्डको एनएभी रू. ९ दशमलव ३५ रहेकोमा पुस मसान्तमा वृद्धि भएर रू. १० दशमलव ४० पुगेको छ ।  त्यसैगरी, फण्ड मंसिर मसान्तसम्ममा रू. १ करोड ३० लाख ९८ हजार नोक्सानीमा रहेकोमा पुस मसान्तमा रू. ८३ लाख ३८ हजार धनात्मक भएको छ ।  फण्डले पुस मसान्तसम्ममा रू. १ करोड १८ लाख ६९ हजार आम्दानी गर्न सफल भएकाले नाफामा गएको हो ।