बन्द हुने अवस्थामा द्रुत बस सेवा

काठमाडौं। गत असोज ३ गतेदेखि सरकारले सञ्चालन गरेको दु्रत बस सेवा बन्द हुने अवस्थामा पुगेको छ । भौतिक पूर्वाधार तथा यातायात मन्त्रालयले आवश्यक अध्ययन नै नगरी सञ्चालनमा ल्याएकाले द्रुत बस सेवा बन्द हुने अवस्थामा पुगेको हो । मन्त्रालयले भक्तपुरको सूर्यविनायक–रत्नपार्क (१३ किलोमिटर) रूटमा २५ ओटा बस सञ्चालनमा ल्याएको थियो । भौतिक पूर्वाधार तथा यातायातमन्त्री प्रकाश ज्वालाले द्रुत बस सेवा यातायात क्षेत्रमा एउटा ठूलो उपलब्धि भएको दाबी गरेका थिए । उक्त सेवा २ करोड रुपैयाँको लगानीमा शुरू गरिएको थियो । द्रुत बसलाई छुट्टै लेनमा गुड्ने सुविधाका लागि रातो रङ पोतिएको थियो । ती लेनमा दैनिक बिहान ९ देखि ११ बजेसम्म र अपराह्न ४ देखि साँझ ६ बजेसम्म दु्रत बस गुड्ने बताइएको थियो । तर अहिले यो सेवा अव्यवस्थित बनेको छ । द्रुत बस गुड्न छुट्टै लेनको व्यवस्था गरिए पनि सबै गाडी सोही लेनबाट गुड्दा दु्रत बस सेवा प्रभावकारी हुन नसकेको यातायात व्यवस्था विभागका महानिर्देशक उद्धवप्रसाद रिजालले बताए । ‘द्रुत बस सेवा अन्तर्गत सञ्चालित बस र अन्य बस गुड्ने लेन एउटै भयो, जसले गर्दा यसको प्रभावकारिता घट्यो,’ उनले भने, ‘द्रुत यातायातको सेवा दिने विषयमा हामी नयाँ नै छौं, सिक्दै पनि छौं । सञ्चालनअघि अध्ययन पनि कम भयो । तिहारपछि यसलाई थप प्रभावकारी ढंगले अगाडि बढाउँछौं ।’ एम्बुलेन्स र दमकललाई भन्दा पनि बढी प्राथमिकतामा राखेर द्रुत बसका नाममा छुट्टै लेनको व्यवस्था गरिएकाले साधारण यात्रुवाहक बस तथा अन्य गाडीले घण्टौंसम्म ट्राफिक जाम खेप्नुपरेको भन्दै यसको आलोचना समेत हुँदै आएको छ । विभागका महानिर्देशक रिजालले तिहारपछि उक्त रुटमा चल्ने सबै सार्वजनिक यात्रुवाहक बसलाई द्रुत बस सेवा अन्तर्गत सञ्चालन गर्नेगरी अध्ययन भइरहेको बताए । मन्त्रालयले सो सेवा परीक्षणका लागि मात्रै शुरू गरिएको भन्दै व्यवस्थापनमा केही समस्या देखिनु स्वाभाविक भएको दाबी गरेको छ । मन्त्रालयकी सूचना अधिकारी शुभा श्रेष्ठले अब थप अध्ययनसहित प्रभावकारी रूपमा द्रुत बस सेवा शुरू गरिने उनले बताइन् ।