गलकोट । स्थानीय उत्पादन ताराखोलाको आलु र मुस्ताङको स्याउ बेमौसममा विक्री गर्ने र आयातित स्याउ, केरा र आलुको सुपथ मूल्यमा बजारीकरण गर्ने उद्देश्यले गलकोटमा शीतभण्डार सञ्चालनमा ल्याइएको छ । सात युवाले सिद्ध भैरव ग्र्रूपमार्फत सामूहिक लगानीमा शीतभण्डारण सञ्चालनमा ल्याएको हुन् । गुल्मीका ईश्वरीप्रसाद ज्ञवाली र गलकोटका ६ युवा मिलेर स्थानीय आलु र स्याउ तथा आयातित केरा, आलु र स्याउको बजारीकरण गर्न दुई करोडको लागतमा शीतभण्डारण गृह सञ्चालनमा ल्याइएको हो । अहिले बेमौसमी आलु, स्याउ र केरालाई प्राथमिकतामा राखेर शीतभण्डारण गृह सञ्चालन गर्दै आएको सिद्धभैरव ग्रुपका सञ्चालक ज्ञवालीले जानकारी दिए । ‘हाम्रो मुख्य उद्देश्य ताराखोलाको आलु र मुस्ताङको स्याउलाई शीतभण्डारण गृहमा राखेर बेमौसममा विक्री गर्ने हो, अहिले आलुभन्दा फलफूललाई बढी जोड दिइएको छ,’ शीतभण्डारण गृहको व्यवस्थापकसमेत रहेका उनले भने ।
