वीरगञ्ज (अस) । वीरगञ्ज नाकाबाट आयात हुने वस्तुमा इन्धन र सवारीसाधनको वर्चस्व देखिएको छ । यो नाकाबाट भित्रिने वस्तुमा औद्योगिक कच्चापदार्थको परिमाण पनि उल्लेख्य हुने गरेको छ । वीरगञ्ज भन्सार कार्यालयले चालू आर्थिक वर्ष (आव) २०७८/७९ को पहिलो ७ महीनामा तयार पारेको मुख्य आयातित वस्तुको सूचीको पहिलो स्थानमा डिजेल र दोस्रोमा पेट्रोल परेको छ । मुख्य पाँच वस्तुको मुख्यसूची इन्धन र सवारीसाधनले नै ओगटेको वीरगञ्ज भन्सारका प्रमुख भन्सार अधिकृत हरिहर पौडेलले बताए । ‘यो नाकाबाट मुख्यरूपमा भित्रिने भनेको पेट्रोलियम पदार्थ, सवारीसाधन र औद्योगिक कच्चापदार्थ नै हो,’ पौडेलले भने ।
पेट्रोलियम पदार्थ भित्रिने पाइपलाइनसँग जोडिएको र मुख्य औद्योगिक कोरिडोर यही क्षेत्रमा भएकाले इन्धन र औद्योगिक कच्चा पदार्थको मुख्य परिमाण यही नाकाबाट भित्रिन्छ । वीरगञ्जमै रहेको सुक्खा बन्दरगाह भन्सारबाट फलाम र खाद्यान्न उद्योगको कच्चा पदार्थ आउने गरेको छ ।
वीरगञ्ज नाका देशको मध्यभागमा हुनु र संघीय राजधानी काठमाडौंसँग निकट दूरीमा भएकाले सवारीसाधन र अन्य उपयोग्य वस्तुको ठूलो परिमाण पनि यही नाकाबाट बढी भित्रिन्छ ।
वीरगञ्ज भन्सारबाट साउनदेखि माघसम्मको अवधिमा ५२ अर्ब ९६ करोड रुपैयाँ बराबरको ७१ लाख ८७ हजार किलोलिटर (केएल) डिजेल आयात भएको भन्सार कार्यालयको तथ्यांकले देखाउँछ । वर्ष गत आव २०७७/७८ को समीक्षा अवधिको तुलनामा डिजेल आयात २४ प्रतिशतले बढेको छ ।
यो अवधिमा १८ अर्ब ३६ करोड रुपैयाँको २ लाख ३१ हजार केएल पेट्रोल भित्रिएको छ । १८ करोड २ लाख किलो एलपी ग्यास आयात भएको देखिन्छ । सवारीसाधनतर्फ जीप, कार र भ्यान आयात सूचीको दोस्रो सूचीमा छ । यो नाकाबाट बितेको ७ महीनामा ५३ अर्ब ७२ करोड रुपैयाँ बराबरको जीप, कार र भ्यान आयात भएको भन्सारले बताएको छ । १८ अर्ब ३६ करोड रुपैयाँको मोटरसाइकलमात्रै आएको छ । पछिल्लो समयमा मोटरसाइकलका एसेम्बलिङ प्लान्ट स्वदेशमै खुलेपछि मोटरसाइकलका पार्टपुर्जा र ‘अन–एसेम्बल्ड’ मोटरसाइकलको आयात पनि उल्लेख्य देखिएको छ ।
पिकअप गाडी, ट्रक, मिनी बसलगायत यो नाकाबाट भित्रिने मुख्य सवारीसाधन हुन् । औद्योगिक कच्चा पादर्थतर्फ भटमासको कच्चा तेल, सूर्यमुखीको तेल, कच्चा पाम तेल, एचआर सीट, स्टील स्ट्रीप, पोलिथिन दाना, कोइलालगायत वस्तु भित्रिएको वीरगञ्ज भन्सारले बताएको छ ।
