नेपाली राजनीतिका ऐतिहासिक पक्षको विश्लेषण तथा तत्सम्बन्धी यथार्थपरक मान्यता र पद्धतिको पैरवी गरेर हामी कहिल्यै थाकेनौँ । जनताका उन्मुक्ति र जनप्रतिनिधिमूलक संस्थाको अपरिहार्यताबारे विचार विश्लेषण गर्दा अमर शहीदको नाम अग्रपङ्क्तिमा आउँछ । नेपालले विगतका कालखण्डदेखि अभ्यास गरी आएको लोकतान्त्रिक शासन पद्धतिको संस्थागत विकास तथा जनतालाई वास्तविक अर्थमा अधिकारसम्पन्न बनाई सङ्घीय राज्य संरचनाका मान्यतालाई कार्यान्वयन तहमा ल्याउने दिशामा परिणाममुखी कार्य भएमा त्यो नै राज्य र जनताका तर्फबाट वीर सपूतप्रति सच्चा श्रद्धाञ्जलि हुन सक्छ ।
