चिनियाँ अधिकारीसँगको छलफलपछि बाइटडान्सले आईपीओको योजना खारेज गरेको खुलासा

असार २८, पेचिङ (चीन) । चिनियाँ प्रविधि कम्पनी बाइटडान्सले सीमापार कम्पनीको शेयर निष्कासनको योजना खारेज गरेको खुलासा भएको छ ।  कम्पनीलाई चिनियाँ अधिकारीहरुले डेटा सुरक्षा जोखिममा ध्यान दिन आदेश दिएपछि कम्पनीले यस्तो कदम चालेको हो । कम्पनीले आफ्नो व्यवसायको सबै वा केही स्वामित्वलाई अमेरिका वा हङकङमा प्राथमिक शेयर निष्काशन (आईपीओ) मा लैजानेबारे विचार गरिरहेको भन्दै मंगलवार वाल स्ट्रिट जर्नलले समाचार छापेको थियो ।  साइबरस्पेश र शेयर नियामकहरुसँग मार्चको अन्त्यमा भेटवार्तापछि कम्पनीका संस्थापक चाङ यिमिङले अनिश्चितकालका लागि थाँती राखेको यस मामिलाबारे जानकार स्रोतले भनेको भन्दै समाचारमा भनिएको छ ।  त्यति बेला कम्पनीमा प्रमुख वित्तीय अधिकृत (सीएफओ) नहुनुलगायत अन्य केही कारणले गर्दा पनि बाइटडान्सले आईपीओमा ढिलाई गरेको बताइएको छ । कम्पनीले मार्चमा चिनियाँ स्मार्टफोन निर्माता कम्पनी साओमीका पूर्व कार्यकारी शोउ चि चलाई सीएफओको रुपमा नियुक्त गरेपछि सम्भावित आईपीओबारे अड्कलबाजी बढेको थियो ।  यसबारे सोधिएको प्रश्नमा बाइटडान्सका प्रवक्ताले आफूहरुले अफवाह वा अड्कलबाजीबारे प्रतिक्रिया दिन नचाहेको जवाफ दिएको सीएनबीसीले एउटा समाचारमा भनेको छ ।  घरेलु अनलाइन टयाक्सी सेवा प्रदायक कम्पनी तितीले न्यूयोर्क स्टक एक्सचेञ्जमा गत महीना शेयर सूचिकरण गरेलगत्तै चिनियाँ नियामकहरुले कम्पनीमाथि साइबर सुरक्षा समीक्षा शुरु गरेकै बेलामा यो खबर आएको हो । पछिल्लो समय चीनले अमेरिकामा हालसालै सूचीकृत भएका चिनियाँ कम्पनीहरुमाथि नियामक कडाई बढाएको छ । एजेन्सी