काठमाडौं । प्रधानमन्त्री शेरबहादुर देउवाको भारत भ्रमणमा ऊर्जासम्बन्धी एजेन्डामा समेत छलफल हुने बताइएको छ । नेपाल–भारत विद्युत् व्यापार र संयुक्त लगानीमा नेपालमा जलविद्युत् आयोजना बनाउने एजेन्डामा विशेष छलफल हुने भएको हो ।
प्रधानमन्त्री देउवा शुक्रबार भारत भ्रमणमा जाँदै हुनुहुन्छ । सोही क्रममा ऊर्जासम्बन्धी एजेन्डाले पनि उच्च प्राथमिकता पाउने ऊर्जा, जलस्रोत तथा सिँचाइ मन्त्रालयका अधिकारी बताउँछन् ।
प्रधानमन्त्रीको भारत भ्रमणमा ऊर्जामन्त्री पम्फा भुसाल समेत सहभागी हुने बताइएको छ । यद्यपि, यस विषयमा निर्णय हुन बाँकी छ । ऊर्जामन्त्री सहभागी नभए पनि उक्त एजेन्डामा छलफल गर्ने गरी भ्रमणको प्रारम्भिक एजेन्डा तय गरिएको स्रोतको भनाइ छ । ऊर्जा मन्त्रालयको तर्फबाट उक्त एजेन्डा बनाइएको मन्त्रालयका एक अधिकारीले बताए ।
भारत सरकारले ऊर्जामन्त्री भुसाललाई यसअघि नै भ्रमणको लागि छुट्टै निम्तो पठाएको थियो । सोही अनुसार ऊर्जामन्त्री भारत भ्रमणमा जाने सम्भावना रहेको मन्त्रालयका अधिकारी बताउँछन् । यसलाई मन्त्रिपरिषद्को बैठकबाट टुंगोमा पुर्याइनेछ ।
एक महीनाअघि काठमाडौंमा सम्पन्न नेपाल–भारत ऊर्जा बैठकमा पनि विद्युत् व्यापार, संयुक्त लगानीमा जलविद्युत् आयोजना बनाउने विषयमा छलफल भएको थियो । प्रधानमन्त्रीको भारत भ्रमणमा पनि यस विषयले प्राथमिकता पाउने बताइएको छ ।
प्रधानमन्त्रीको भारत भ्रमणका बेला सोलु कोरिडोर १३२ केभी डबल सर्किट प्रसारण लाइनको उद्घाटन समेत गरिनेछ । भारतको राजधानी नयाँ दिल्लीबाट प्रधानमन्त्री देउवा र भारतीय प्रधानमन्त्री नरेन्द्र मोदीले संयुक्त रूपमा उक्त प्रसारण लाइनको उद्घाटन गर्ने कार्यक्रम तय भएको मन्त्रालयले जानकारी दियो ।
शनिवार दुवै देशका प्रधानमन्त्रीले संयुक्त रूपमा भर्चुअल माध्यम (स्विच थिचेर) बाट उक्त आयोजनाको उद्घाटन गर्नुहुनेछ । उक्त आयोजनाको निर्माण गत पुसमा सम्पन्न भएको थियो । गत फागुन २ गते प्रसारण लाइन चार्ज समेत गरिसकिएको छ । अब उद्घाटन गरेर आयोजना सञ्चालनमा ल्याइने छ । सिरहा, उदयपुर, ओखलढुंगा हुँदै सोलुखोम्बु पुग्ने उक्त प्रसारण लाइनको लम्बाइ ९० किलोमीटर छ । त्यसमा ३ सय २ वटा टावर छन् ।
नेपाल सरकारको लगानी र भारतको निर्यात–आयात (एक्जिम) बैंकको ऋणमा उक्त आयोजना बनाइएको हो । भारतको मोहन इनर्जी कम्पनीले आयोजना बनाउने ठेक्का पाएको थियो । यो आयोजना बनाउने क्रममा विभिन्न अवरोध आएका थिए । अवरोध सामना गर्दै गत पुसमा आयोजना निर्माण सम्पन्न भएको थियो ।
आयोजना सञ्चालनमा आएपछि २३ दशमलव ५ मेगावाट जडित क्षमताको सोलु खोला लगायत आयोजनाको बिजुली राष्ट्रिय प्रसारणमा जोडिने छन् । प्रसारण लाइन नबन्दा सो क्षेत्रका अधिकांश आयोजनाले विद्युत् उत्पादन गर्न पाएका छैनन् । आयोजना सञ्चालनमा आएपछि त्यो समस्या समाधान हुने बताइएको छ ।
