नेपाल दूरसञ्चार प्राधिकरणले ३८ जिल्लामा वायरलेस ब्रोडब्याण्ड इण्टरनेट पुर्याउन प्रक्रिया शुरू गरेको छ । यसका लागि दुई महिनाभित्र सेवाप्रदायक कम्पनीबाट अन्तरराष्ट्रिय बोलपत्र आह्वान गरिने भएको छ । अन्तरराष्ट्रिय बोलपत्र मार्फत एक सेवाप्रदायक कम्पनी छनोट गर्ने प्राधिकरणले बताएको छ । वायरलेस ब्रोडब्याण्ड तारविना नै उच्च गतिको इण्टरनेट सेवा सञ्चालन गर्न सकिने प्रविधि हो । ‘तिहारपछि सेवाप्रदायक कम्पनी छनोट गर्न बोलपत्र आह्वानको तयारीमा छौं, ’ प्राधिकरणका प्रवक्ता कैलाशकुमार न्यौपानेले भने, ‘छनोट हुने कम्पनीलार्इ निश्चित समय दिएर सेवा विस्तार गर्न लगाउँछौं ’।
सेवाप्रदायक कम्पनी छनोट गर्न प्राधिकरणले एक समितिसमेत गठन गरिसकेको छ । छनोट हुने कम्पनीले प्राधिकरणले तोकेको समयभित्र निश्चित गुणस्तरको सेवासञ्जाल स्थापना गर्नुपर्नेछ ।
प्राधिकरणले अहिले बोलपत्रमा सहभागी हुने कम्पनीका लागि मापदण्ड तथा विधिहरू तयार गरिरहेको छ । तिहारसम्म यो कार्य सकिने प्राधिकरणले बताएको छ । ३८ जिल्लामा यस्तो सेवा पुर्याउन एशियाली विकास बैंक (एडीबी) ले आर्थिक सहयोग गर्दै छ ।
नेपाल सरकार र एडीबीबीच सन् २००८ मा भएको आईसीटी फर डेभलपमेण्ट कार्यक्रमअन्तर्गत यो सेवा सञ्चालन गर्न लागिएको हो ।
वर्ष ६, अंक ३४, सोमवार, २५ असोज २०६७