प्रदीप गिरी सच्चा समाजवादी नेता हुनुहुन्थ्यो । सीमित घेराभित्र बस्न नरुचाउने, अहिलेको राजनीतिक लुछाचुँडीबाट माथि उठेका अग्ला नेता हुनुहुन्थ्यो । पद र लाभको ठाउँबाट टाढा रहनुभयो । अरू बोल्छन्, उहाँले आफ्नो जिन्दगीमै सादा जीवन, उच्च विचार अपनाउनुभयो । मनमा लागेको कुरा भित्र नराख्ने, बाहिर निकाल्ने बानी थियो । अघि बसिरहेकाले के सोचिरहेका छन्, त्यता ध्यान जाँदैनथ्यो, मनमा लागेको कुरा गर्नुहुन्थ्यो । पार्टीमा सम्भावना भएका नेताहरूलाई माया देखाउने, अघि बढाउन सिफारिस गर्ने गर्नुहुन्थ्यो । मलाई पनि ‘अघि बढ्नुपर्छ, तिमी गर्न सक्छौ’ भनेर बारम्बार प्रोत्साहन गर्नुहुन्थ्यो । पार्टीमा कसरी युवालाई नेतृत्व हस्तान्तरण गर्ने भन्नेमा उहाँको चिन्ता थियो ।
