युनाइटेड मोदी हाइड्रोपावरले विद्युत् विक्रीबापत गर्‍यो रू. १६ करोडभन्दा बढी आम्दानी

काठमाडौं । युनाइटेड मोदी हाइड्रोपावर लिमिटेडले चालू आर्थिक वर्षको दोस्रो त्रैमासिक वित्तीय विवरण सार्वजनिक गरेको छ । विवरणअनुसार कम्पनीले चालू आवको दोस्रो त्रैमाससम्म विद्युत् विक्रीबापत रू. १६ करोड ५८ लाख आम्दानी गरेको छ । गत आवको तुलनामा यो आम्दानी १२ प्रतिशत बढी हो । गत आवमा कम्पनीले विद्युत् विक्रीबापत रू. १४ करोड ६८ लाख आम्दानी गरेको थियो । त्यस्तै कम्पनीले चालू आवको दोस्रो त्रैमाससम्म रू. २ करोड ३ लाख नाफा कमाएको छ । यो नाफा गत आवको तुलनामा १७ प्रतिशत कम हो । गत आवमा कम्पनीले रू. २ करोड ४७ लाख नाफा कमाएको थियो । चालू आवमा कम्पनीको वित्तीय खर्च बढेकोले नाफा घटेको हो । गत आवको तुलनामा चालू आवमा कम्पनीको वित्तीय खर्च ४७ प्रतिशत वृद्धि भएको छ । गत आवमा कम्पनीको वित्तीय खर्च रू. ४ करोड १४ लाख रहेकोमा चालू आवमा रू. ६ करोड ११ लाख पुगेको छ ।  कम्पनीको चुक्तापूँजी रू.१ अर्ब १५ करोड रहेको छ । चालू आवको दोस्रो त्रैमाससम्ममा कम्पनीले जगेडामा रू. ११ करोड १९ लाख सञ्चित गरेको छ । कम्पनीको प्रतिशेयर आम्दानी रू. १ दशमलव ७७ र प्रतिशेयर नेटवर्थ रू. १०९ दशमलव ७३ रहेको छ ।