फागुन १२, काठमाडौं । नेपाल र भारत जलविद्युत् क्षेत्रमा संयुक्त लगानी गरेर नयाँ आयोजनाहरु बनाउन सहमत भएका छन् ।
ऊर्जा, जलस्रोत तथा सिंचाइ मन्त्रालयले जारी गरेको प्रेस विज्ञप्तिमा नेपाल- भारत ऊर्जा सचिवस्तरीय बैठकमा भएको सहमतिअनुसार भारतले गरेको प्रस्तावअनुसार अध्ययन अघि बढाउन संयुक्त प्राविधिक टोली गठन हुने छ ।
नेपाल–भारत उर्जा सचिवस्तरीय संयुक्त संयन्त्र ‘जोइन्ट स्टेयरिङ कमिटी’ (जेएससी) को काठमाडौंमा बिहीवार सकिएको बैठकमा दुई देश बीच मौजुदा प्रसारण लाइनहरु, निर्माणाधीन तथा प्रस्तावित अन्तरदेशीय प्रसारणलाइनहरु, अरुण- ३ जलविद्युत् तथा प्रसारण लाइन आयोजना, अन्तरदेशीय विद्युत् आयात निर्यात लगायतका विषयहरुमा सहमति भएको बताइएको छ ।
नेपाल र भारत बीच संयुक्त रुपमा ठूला जलविद्युत् आयोजना निर्माण गर्ने सम्बन्धमा दुबै देशको तीन - तीन जना सदस्यहरु सम्मिलित संयुक्त प्राविधिक टोली गठन गर्ने सहमति भएको ।
बैठकमा सहभागी एक अधिकारीका अनुसार समितिले जलविद्युत् र प्रसारण लाइनमा नेपाल र भारतले गर्नसक्ने संयुक्त लगानीबारे सोही समितिले आवश्यक सुझाव दिने छ । कुन जलविद्युत् आयोजनामा संयुक्त लगानी गर्ने र त्यसलाई पायक पर्ने गरी कुन प्रसारण लाइन बनाउने र विस्तार गर्ने भन्ने सन्दर्भमा समितिले प्रतिवेदन दिने छ ।
नेपालको विद्युत् कनेक्टिभिटी भारतको बंगाल राज्यसम्म बढाउनका लागि १३२ केभी प्रसारण लाइन बनाउन संयुक्त कार्यदल बनाएर अध्ययन गर्ने पनि दुई पक्ष बीच सहमति भएको छ ।
नेपाल–भारत अन्तरदेशीय प्रसारण लाइनका रुपमा रहेको ढल्केवर–मुजफ्फरपुर प्रसारण लाइनबाट ६०० मेगावाट(मेवा) विद्युत् प्रवाह गर्न पनि भारत सहमत भएको छ ।
बैठकमा भारतले नेपालका थप आयोजनाहरुको बिजुली किन्न सहमती व्यक्त गरेको स्रोतले बताएको छ ।
