पाकिस्तानी अर्थतन्त्रको अधोगति : सुजुकी र टोयटापछि होन्डाले पनि बन्द गर्‍यो उद्योग

इस्लामावाद । पाकिस्तान अहिले चरम आर्थिक अभावसँग जुधिरहेकै समयमा कार कम्पनीहरुले पनि एक पछि अर्को गर्दै कारखाना बन्द गरिरहेका छन् । बुधवार जापानी कार निर्माता कम्पनी होन्डाले आपूर्ति शृङ्खलामा चरम अवरोध भएको भन्दै कारखाना बन्द गरेको जियो न्यूजको खबरलाई उद्धृत गर्दै एएनआईले समाचार छापेको छ । होन्डा अटोमोबाइलका लागि कार एसेम्बल गर्ने कम्पनी 'होन्डा एट्लास कार्स'ले कारखाना बन्द गर्नुको कारण पाकिस्तानको अहिलेको आर्थिक अवस्थालाई दोष दिएको छ । कारखाना मार्च ९ देखि ३१ को बीचमा बन्द रहनेछ । आफूले उत्पादनलाई निरन्तरता दिन नसक्ने अनि महीनाको बाँकी अवधिभर कारखाना बन्दै रहने कम्पनीले बताएको छ । कम्पनीले पाकिस्तान स्टक एक्सचेञ्जलाई यसबारे सूचीत समेत गरिसकेको छ । कम्पनीको आपूर्ति शृङ्खलामा गम्भीर अवरोध आएकोले सो निर्णय गर्नु परेको जियो न्यूजले उल्लेख गरेको छ । डलरको चरम अभावबीच पाकिस्तान सरकारले पार्ट्स, कच्चा पदार्थहरुको आयातको लागि एलसी खुलाउन रोक लगाउने समेतका कठोर उपायहरू अपनाएको छ भने विदेशी भुक्तानी रोकेको छ । यस्ता उपायहरुले कम्पनीको आपूर्ति शृङ्खलामा नराम्ररी धक्का लागेको छ । यस अघि नै सुजुकी र टोयोटाका लागि पाकिस्तानी असेम्बलर कम्पनी सिन्धु मोटर कम्पनीले पनि कारखाना पूरै बन्द गर्ने घोषणा गरेका थिए । पाकिस्तानको अटो उद्योग पूर्ण रुपमा आयातमा निर्भर छ । डलरको चरम अभाव र पाकिस्तानी रुपयाको भाउमा तीव्र अवमूल्यनसँगै केन्द्रीय बैंकले एलसी खुलाउनमा रोक लगाएको छ । अहिले चरम महँगी सामना गरिरहेका अर्थतन्त्रमा पाकिस्तान पनि पर्छ । रुपयाको भाउमा आएको कमीले आयात धान्नै नसक्ने भएको अवस्थामा कर्जाको आकाशिएको लागतले पनि माग थप खस्काएको छ । बजारमा माग घटेको अनि एलसी पाउन नसकेकै अवस्थामा इन्भेन्टरी कायम गर्न नसकेको जस्ता कयौं कारणहरुले गर्दा पाकिस्तानमा उत्पादन पूर्ण वा आशिंक बन्द गर्ने अटो निर्माताहरुको संख्या बढेको छ । एजेन्सी