काठमाडौं । सुनचाँदी व्यवसायसँग सम्बन्धित तीनओटा महासंघले तत्काल सुनचाँदी कारोबार सम्बन्धी एकीकृत निर्देशिका जारी गर्न सरकारसँग माग गरेका छन् । उपप्रधान तथा अर्थमन्त्री विष्णुप्रसाद पौडेलसँग वुधवार भेट गरी नेपाल सुनचाँदी व्यवसायी महासंघ, नेपाल सुनचाँदी रत्न तथा आभूषण महासंघ र नेपाल हस्तकला महासंघका प्रतिनिधिमण्डलले यस्तो आग्रह गरेका हुन् ।
तीनओटै महासंघको संयुक्त प्रतिनिधिमण्डलले व्यवसायीको मागलाई राज्यले सम्बोधन नगरे व्यवसाय नै बन्द गरेर सडकमा उत्रने चेतावनी समेत दिएका छन् । लामो समयदेखि आग्रह गर्दा पनि सरकारी निकायबाट यसको सुनुवाइ नभएको उनीहरूको गुनासो छ ।
नेपाल सुनचाँदी व्यवसायी महासंघका अध्यक्ष माणिकरत्न शाक्यले सुनचाँदीको कारोबार सम्बन्धी प्रष्ट नीति निर्देशिका नहुँदा व्यवसाय सञ्चालनमा कठिनाइ भएको बताए । निर्देशिकाकै अभावमा कच्चापदार्थको अभाव हुने, कारोबार सञ्चालनका क्रममा विभिन्न किसिमका व्यावसायिक झन्झट र व्यवधान उत्पन्न हुने जस्ता समस्या आएको व्यवसायीको भनाइ छ ।
नेपाल सुनचाँदी रत्न तथा आभूषण महासंघका अध्यक्ष सुरेशमान श्रेष्ठ र नेपाल हस्तकला महासंघका अध्यक्ष प्रचण्ड शाक्यले पनि आ–आफ्नो तर्फबाट व्यवसायीका समस्या जानकारी गराएका थिए । उपप्रधान तथा अर्थमन्त्री पौडलले व्यवसायीका समस्यालाई आफूले गम्भीर रूपमा लिएको भन्दै ती समस्याको समाधानका लागि आवश्यक पहल गर्ने आश्वासन दिएका थिए । व्यवसायीले राखेका समस्याको अध्ययन गरी त्यसको समाधानका लागि आवश्यक पहल गर्ने उनले बताए ।
