पुस १४, नयाँदिल्ली(भारत) । भारतमा कोरोना भाइरसबाट थप ९ हजार १९५ जना संक्रमित थपिएका छन् ।
केन्द्रीय स्वास्थ्य र परिवार कल्याण मन्त्रालययले बुधवार दिएको जानकारी अनुसार विगत २४ घण्टामा थपिएका संक्रमितहरु मध्ये ७८१ जना ओमिक्रोन भेरियन्टका रहेका छन् । यसैसँगै भारतमा कुल कोरोना संक्रमित संख्या ३ करोड ४८ लाख ८ हजार ८८६ पुगेका पनि सो मन्त्रालयले जानकारी दिएको छ ।
सोही अवधिमा थप ३०२ जनाको कोरोना संक्रमणका कारण मृत्यु भएको छ । यसैसँगै भारतमा कोरोनाको कारण ज्यान गुमाउने व्यक्तिको संख्या ४ लाख ८० हजार ५९२ पुगेको मन्त्रालयले थप जानकारी दिएको छ ।
भारतमा अहिले संक्रमित अवस्थामै रहेकाको संख्या ७७ हजार २ जना रहेका छन् । अहिले संक्रमित अवस्थामै रहेकाको संख्या कुल संक्रमितको संख्याको शून्य दशमलव २२ प्रतिशत मात्रै रहेको मन्त्रालयले बताएको छ । सक्रिय संक्रमितको यो संख्या सन् २०२० मार्चपछि सबभन्दा कम हो ।
गएको २४ घण्टामा भारतमा ७ हजार ३४७ जना कोरोना संक्रमणमुक्त भएका छन् । यसैसँगै कोरोना शुरु भएयता हालसम्म ३ करोड ४२ लाख ५१ हजार २९२ जना कोरोना संक्रमणमुक्त भएका छन् । भारतमा कोरोना भाइरस निको हुने दर ९८ दशमलव ४० प्रतिशत रहेको बताइएको छ । यो संख्या सन् २०२० को मार्चपछि सबभन्दा बढी भएको समाचारमा जनाइएको छ ।
भारतमा हालसम्म ६७ करोड ४१ लाख भन्दा बढी व्यक्तिको कोरोना परीक्षण भएको छ । यहाँ जनवरी १६ सन् २०२१ बाट कोरोना भाइरसविरुद्ध खोप अभियान शुरु भएको थियो । सो समयदेखि हालसम्म भारतमा १ अर्ब ४३ करोड १५ लाख ३५ हजार ६४१ भन्दा बढी डोज खोप लगाइएको छ । रासस/ एएनआई
