साउन २८, चितवन । भरतपुर महानगरले महानगरभित्रका पाँचओटा सरकारी विद्यालयलाई स्कुल बस प्रदान गरेको छ । सामुदायिक विद्यालयको शिक्षाको स्तर विकास गरी विद्यार्थी र अभिभावकको प्रमुख रोजाईमा पार्ने योजना र उद्देश्य सहित उक्त बस हस्तान्तरण गरेको हो ।
बस पाउने विद्यालयहरुमा नारायणी नमूना माध्यमिक विद्यालय, कविलास माध्यमिक विद्यालय, भिमनगर माध्यमिक विद्यालय, प्रभात माध्यमिक विद्यालय, लक्ष्मी माध्यमिक विद्यालय रहेका छन् । मंगलवार महानगरमा एक कार्यक्रमको आयोजना गरी प्रमुख रेनु दाहालले विद्यालयका अध्यक्ष र प्रध्यानाध्यापक लाई बसको साचो हस्तान्तरण गरेकी थिइन् ।
महानगरका अनुसार रुट प्रमिट र इन्स्योरेन्स सहित प्रति बस १९ लाख ९८ हजार रुपैयाँको खर्चमा महानगरले विद्यालयलाई बस हस्तान्तरण गरेको हो ।
हस्तान्तरण पछि बोल्दै दाहालले महानगरको शिक्षाको गुणस्तर र सेवा सुविधा दिने उद्देश्यले महानगरले शिक्षा विकासको कार्यक्रम अन्त्रगत यस पटक ५ विद्यालयलाई स्कुल बस हस्तान्तरण गरेको महानगर प्रमुख रेनु दाहालले बताइन् ।
स्कुलको पूर्वाधार निर्माण, स्तरोन्नतिदेखि शैक्षिक पुर्वाधार विकास गर्दै प्रविधिमैत्रि शिक्षण सिकाईमा महानगरले जोड दिएको भन्दै दाहालले महानगरका निजी विद्यालयभन्दा धेरै गुणा बढी सामुदायिक विद्यालय पनि अघि बढ्न सक्ने बताइन् ।
भरतपुर महानगरलाई अब महानगर शैक्षिक शहरका रुपमा विकास गर्ने आफ्नो योजना रहेको दाहालको भनाइ छ । महानगरमा त्रिभुवन विश्वबिद्यालय अन्तर्गतको, आंगिक इन्जिनियरिंग कलेज, प्रहरी स्कुल, भरतपुर बहुप्राविधिक शिक्षालय ल्याउन सफल भएको र खुला विश्वविद्यालय पनि ल्याउन पहल गरिरहेको दाहालले बताइन् ।
अघिल्लो आर्थिक वर्षको बजेटबाट महानगरले विद्यालयलाई बस प्रदान गरेको महानगरका प्रमुख प्रशाशकिय अधिकृत भोजराज खतिवडाले बताए । चालू आर्थिक वर्षमा पनि स्कुल बस दिने कार्यक्रमलाई निरन्तरता दिईने खतिवडाको भनाइ छ । महानगरले यसअघि पनि सामुदायिक विद्यार्थीका लागी साईकल हस्तान्तरण समेत गरेको थियो
भरतपुर महानगरका शैक्षिक प्रशासन महाशाखा प्रमुख महेन्द्र पौडेलले विद्यालयको शैक्षिक विकाससँगै विद्यार्थी र अभिभावकमा थप उर्जा दिलाउन विद्यालयलाई स्कुल बस हस्तान्तरण गरिएको बताए ।
किशोरीहरुलाई साइकल वितरण, लोपउन्मुख र सिमान्तकृत समुदायका बालबालिकाका लागि छात्रवृत्ति प्रदान, द्वन्द्व प्रभावित बालबालिकाका लागि शैक्षिक सहयोग सामग्री प्रदान, अपागंता भएका बालबालिकाका लागि शैक्षिक समग्री लगायतका अन्य सेवा सुविधाहरु महानगरका तर्फबाट प्रदान भएको पौडेलले बताए ।
सरकारी विद्यालयको शैक्षिक विकासका लागि महानगरले गरेको प्रयासको प्रतिफलकै कारण २०७६ मा भन्दा ७७ मा ५ हजार ६०० विद्यार्थीहरु सामुदायिक विद्यालयमा भर्ना भएको उनकोे भनाइ थियो ।
२०७६ मा आर्थिक वर्षमा ३७ हजार विद्यार्थी रहेकोमा बढेर ४२ हजार ५०० पुगेका उनले बताए । संख्यात्मक वृद्धि मात्रै होईन गुणस्तरमा पनि त्यही अनुपातमा सुधार हुँदै जाने आफूहरुको अपेक्षा रहेको उनले बताए ।
कम विद्यार्थी भएको विद्यालयलाई मर्ज गर्ने नीति महानगरको रहेको र मर्ज गर्दा विद्यालय आउन समस्या हुने विद्यार्थीहरुका लागि बसले धेरै सहजता दिने उनको भनाइ छ ।
