फागुन २१, विराटनगर । सुनसरीको गढी गाउँ पालिकामा रहेको चाउचाउ उद्योगमा काम गर्ने ५५३ जना कर्मचारी, मजदूर र मजदूरका आफन्तसमेतको नि : शुल्क स्वास्थ्य परीक्षण गरिएको छ ।
चौधरी ग्रुप अन्तरगत सीजी फुड्स इन्डस्ट्रिज प्रालिको प्राङगणमा आयोजित नि : शुल्क स्वास्थ्य शिविरमा नोवेल मेडिकल कलेज टिचिङ हस्पिटल प्रालिको प्राविधिक सहयोग गरेको थियो । उक्त शिविरमा ५५३ जना विरामीको नि : शुल्क स्वास्थ्य परीक्षण गरिएको थियो ।
अस्पतालका प्रवन्धक नारायण दाहालका अनुसार शिविरमा १७७ जनाको रगत परिक्षण, ११३ जनाको भिडियो एक्सरे, ८७ जनाको इसीजी र ३१ जनाको दाँत निकालिएको छ । चौधरी ग्रुपका इकाई प्रमुख राजीव सिंह राजपुतले उद्योगमा काम गर्ने मजदूर तथा कर्मचारीहरुको सामाजिक उत्तरदायित्व अन्तरगत नि : शुल्क स्वास्थ्य परीक्षण गरिएको बताए ।
कतिपय मजदूरहरु आफ्नो शारिरिक अवस्था सामान्य नरहेको जानकारी पाउँदा - पाउँदै पनि अस्पताल नजाने भएकाले उद्योग भित्रनै नि : शुल्क रुपमा स्वास्थ्य परीक्षणको व्यवस्था मिलाएको पनि उनले बताए ।
उद्योगका प्रशासन तथा मानव संशाधन विभाग प्रमुख उदयप्रकाश शाहका अनुसार उद्योगमा कार्यरत मजदूरहरु ओभरटाइम काम गर्ने भएकाले उनीहरुले स्वास्थ्य परिक्षण गर्न जाने समय नपाउने र कतिपयले समय पाएपनि किन स्वास्थ्य परिक्षण गर्ने भनेर आलटाल गर्ने भएकाले उद्योग भित्र नै शिविर सञ्चालन गरेको बताए ।
उनले आगामी वर्ष पनि यसरी नै उद्योगका मजदूर र कर्मचारीको लागि नि : शुल्क स्वास्थ्य शिविर सञ्चालन गर्ने योजना रहेको बताए ।
