काठमाडौं। अभियान लघुवित्त वित्तीय संस्थाको अर्धवार्षिक समीक्षा गोष्ठी धुलिखेलमा सम्पन्न भएको छ । गोष्ठीमा सञ्चालक, संस्थाका ५ अनुगमन कार्यालय प्रमुख र ६० शाखा प्रमुखको उपस्थिति थियो । कार्यक्रममा संस्थाका अध्यक्ष बाबुराम थापाले बैंकसम्म वित्तीय पहुँच नभएका दुर्गम क्षेत्रका नागरिकलाई लघुवित्त संस्थाले घरदैलोमा पुगेर वित्तीय सेवा दिइरहेको बताए । ‘कृषि कर्जा, पशुपालन कर्जा, मौसमी कर्जा दिएर आम किसानको हितको लागि लघुवित्त संस्थाले महत्त्वपूर्ण काम गरेको छ,’ अध्यक्ष थापाले भने ।
गोष्ठीमा संस्थाका सञ्चालक भोजराज भट्टराईले महिला, किसान र आर्थिक तथा सामाजिक रूपमा पछि परेका वर्गको हितमा काम गर्नुपर्ने र उनीहरूको हित भएमा मात्र संस्थाको हित हुने बताए । कार्यक्रममा सञ्चालक केशव थापाले लघुवित्त कार्यक्रमले देशको आर्थिक विकासमा महत्त्वपूर्ण योगदान दिएको बताए । गोष्ठीमा प्रमुख कार्यकारी अधिकृत तेजेन्द्र शर्मा लम्सालले लघुवित्त कार्यक्रमबाट ऋणीको हितलाई ध्यान दिएर काम गर्नुपर्ने भन्दै लघुवित्त संस्थाका शाखा संख्या धेरै भएर पनि पछिल्लो असहज स्थिति आएको बताए ।
.JPG)
