साउन १५, काठमाडौं । नेपाल फ्रेट फरवार्डरस् एसोशिएसन (नेफा) ले बिहीवार २७ औं कार्गो दिवस मनाएको छ।
नेपालमा कार्गो दिवस मनाउन थालेको २७ वर्ष पुगेको अवसरमा एसोशिएसनले राजधानीमा एक कार्यक्रम गरेर दिवस मनाएको हो । एसोशिएसनले हरेक वर्ष २९ जुलाईमा कार्गो दिवस मनाउँदै आइरहेको छ।
एसोशिएसनका अध्यक्ष मनोज अधिकारीले कार्गो व्यवसायको व्यवासायिक क्षमता अभिवृद्धि र विश्वभर फैलिएको कोरोना महामारी बीच नेपाली लजिष्टिक क्षेत्रलाई जोगाई राख्न कार्गो व्यवसायी र एअरलाइन्सहरुले एक अर्कालाई साथ र सहयोग कायम राख्नु पर्ने बताए ।
यसैगरी एसोशिएसनका निर्वतमान अध्यक्ष प्रकाश सिंह कार्कीले कार्गो सेवा अभिवृद्धि गर्न एशोशिएसन, एअरलाइन्स र रेल सेवा प्रदायक बीच सुमधुर सम्वन्ध कायम राख्न आवश्यक रहेको बताए ।
सो अवसरमा नेपाल एअरलाइन्सका प्रवन्ध निर्देशक डिम प्रसाद पौडेलले नेपाल एअरलाइन्स हाल कठिन मोडमा रहेको भन्दै यसलाई बलियो र प्रतिस्पर्धी बनाउन व्यवस्थापनको तर्फबाट सुधारका कामहरु भइरहेको बताए ।
सोही अवसरमा नेपालबाट सवैभन्दा बढी कार्गो बोक्ने विभिन्न एअरलाइन्स कम्पनी तथा रेल सेवातर्फको कम्पनीलाई पुरस्कार प्रदान गरिएको थियो ।
