फागुन ४, काठमाडौं । नेपाल आयल निगमले पेट्रोलियम पदार्थको मूल्य कम्तिमा पनि १५ दिनका लागि यथावत् राख्ने भएको छ ।
अन्तरराष्ट्रिय बजारमा हालैका दिनमा कच्चा तेलको भाउ बढेर कयौं वर्षयताकै उच्च स्तरमा उक्लिएको छ । भारतबाट आउने तेलको भाउ पनि बढेर आएको छ । तर आयल निगमले यस पटक भने तेलको भाउ नबढाउने भएको हो ।
निगमले बुधबार जारी गरेको विज्ञप्ति अनुसार प्रतिलिटर पेट्रोलको भाउ १ सय ४२ रुपैयाँमा यथावत् राखिएको छ । प्रतिलिटर पेट्रोलमा निगमको लागत १ सय ६१ रुपया ५ पैसा छ । अर्थात् भाउ नबढाउने निर्णयपछि हरेक एक लिटर पेट्रोलमा निगमलाई १९ रुपया ५ पैसा घाटा हुनेछ । पेट्रोलमा निगमले बेहोरेको यो अहिलेसम्मकै उच्च घाटा हो ।
१५ दिनमा पेट्रोलमा निगमले कुल ५४ करोड ४४ लाख रुपैयाँ घाटा बेहोर्ने बताइएको छ । यसअघि निगमले भारतीय आयल कर्पोरेशन (आईओसी)लाई हरेक लिटर पेट्रोलका लागि ८४ रुपयाँ ३२ पैसा तिर्दै आएको थियो । तर यस पटक भने खरिद मूल्य ५ रुपैयाँ ५६ पैसा बढेर ८९ रुपैयाँ ८८ पैसामा पुगेको छ ।
हरेक लिटर पेट्रोलमा निगमले नेपाल सरकारलाई ५८ रुपैयाँ ४८ पैसा कर बुझाउने गरेको छ । यसमा ढुवानी भाडा, निगम खर्च, प्राविधिक नोक्सानीलगायत खर्च समावेश गरेर प्रतिलिटर पेट्रोलको लागत १ सय ६१ रुपैयाँ ५ पैसा पुग्छ । आईओसीले डिजेलको भाउ पनि प्रतिलिटर ५ रुपैयाँ ६३ पैसा बढाएर पठाएको छ ।
योसँगै डिजेलको लागत मूल्य १ सय ४८ रुपैयाँ ४८ पैसामा उक्लिएको छ । तर आयल निगमले डिजेलको विक्री मूल्य यस अघिकै प्रतिलिटर १ सय २५ रुपैयाँ कायम गरेको छ । अर्थात् डिजेलमा पनि निगमको घाटा प्रतिलिटर १५ रुपैयाँ ४८ पैसा छ । यसरी निगमले दैनिक १६ करोड रुपैयाँ भन्दा बढी र १५ दिनमा २ अर्ब ४२ करोड रुपैयाँ घाटा व्यहोर्ने निर्णय गरेको हो ।
नेपालमा पेट्रोलको भाउ पछिल्लो समयय कीर्तिमानी स्तरमा उक्लिएको छ । अन्तरराष्ट्रिय बजारमा कच्चा तेलको भाउ बढेको छ । हालैका दिनमा भाउ प्रतिब्यारेल ९६ डलरसम्म उक्लिएको छ । युक्रेनमा रुसले हमला गर्ने अनुमानबीच पछिल्लो समय अन्तरराष्ट्रिय बजारमा तेलको भाउ बढिरहेको छ । कच्चा तेलको भाउले चाँडै नै प्रतिब्यारेल १०० डलर छुने अनुमान बढेको छ । यो पनि पढ्नुस- तेलको मूल्य प्रतिब्यारेल १५० डलरसम्म पुग्ने चेतावनी, आपूर्तिमा अवरोधको चिन्ता
