असार ११, रौतहट । निर्वाचन आयोगले दुई नगर प्रमुख सहित रौतहटका ७ जना जनप्रतिनिधिको पद रिक्त गरेको छ । माओवादी केन्द्रले कारबाही गरेका रौतहटका ६ पालिकाका ७ जना जनप्रतिनिधिको पद निर्वाचन आयोगले रिक्त गरेको हो । निर्वाचन आयोगले एक सूचना जारी गरी १४ जना जनप्रतिनिधिको पद रिक्त भएको जानकारी दिएको छ ।
माओवादी केन्द्रको तर्फबाट २०७४ को स्थानीय तहको निर्वाचनमा विजयी भएका तर दल त्याग गरी नेकपा एमालेमा प्रवेश गरेकाले पदमुक्त गर्न माग गर्दै निर्वाचन आयोगलाई जानकारी गराएको थियो ।
असार ७ गते बसेको माओवादी केन्द्रको केन्द्रीय समितिको बैठकले उनीहरुलाई पार्टीबाट निष्कासन गरेको औपचारिक निर्णय गरी त्यसको जानकारी निर्वाचन आयोगलाई दिएपछि आयोगले विज्ञप्ति निकालेर पद रिक्त भएको जानकारी गराएको हो ।
आयोगका अनुसार रौतहटको मौलापुर नगरपालिकाका नगर प्रमुख रिना कुमारी साह र कटहरीया नगरपालिकाका नगर प्रमुख सियाराम प्रसाद कुशवाह पदमुक्त भएका हुन् ।
मौलापुर नगरपालिकाका उपप्रमुख गौरिशंकरप्रसाद, देवाही गोनाही नगरपालिकका उपप्रमुख परनिया देवी, फतुवाविजयपुर नगरपालिकाका उपप्रमुख कान्ति देवी, माधवनारायण नगरपालिकाका उप प्रमुख सिमल कुमारी साह, यमुनामाई गाउँपालिकाका उपाध्यक्ष श्रीमती गीतादेवी साह पदमुक्त भएका छन् ।
कैलालीका ४ जना तथा सिरहा, ओखलढुंगा र महोत्तरीका एक–एक जना जनप्रतिनिधिलाई पनि आयोगले पदमुक्त गरिदिएको छ ।
