पुस १९, काठमाडौं। उपत्यकाभित्र जथाभावी जग्गा प्लटिङ हुन थालेपछि काठमाडौं उपत्यका विकास प्राधिकरणले कारबाही प्रक्रिया अघि बढाएको छ।
उपत्यकाभित्र विभिन्न ठाउँमा अनुमति नलिई जथाभावी जग्गा प्लटिङ गरिरहेको भन्दै त्यस्ता जग्गा किन्नु अघि ध्यान पुर्याउन पनि प्राधिकरणले आग्रह गरेको छ।
सरकारी नियकायबाट अनुमति लिएर सामुहिक आवास योजना सञ्चालन गरिरहेका सञ्चालकहरुले ७ दिन भित्र आयोजनास्थलमा बोर्ड राख्न काठमाडौं उपत्यका विकास प्राधिकरण, जिल्ला आयुक्तको कार्यालय ललितपुरले निर्देशन दिएको छ।
बोर्डमा विकासकर्ता डेभलपर्सको नाम, सम्पर्क नम्वर, योजनाको कुल क्षेत्रफल र योजना अनुमति लिएको मिति प्रस्टसँग देखिने गरि योजना स्थलमा होडिङ बोर्ड राख्न प्राधिकरणले निर्देशन दिएको हो ।
उपत्यका विकास प्राधिकरणबाट अनुमति नलिई अव्यवस्थित तवरले जग्गा प्लटिङको काम भइरहेकोले घडेरी खरिद गर्दा विकास प्राधिकरणबाट अनुमति लिए/नलिएको एकिन गरेर मात्रै खरीद गर्न पनि जिल्ला आयुक्तको कार्यालय ललितपुरले आग्रह गरेको छ।
अनुमति नलिई जग्गाको प्लटिङ गरिरहेका व्यक्ति तथा संस्थामाथि कारबाही प्रक्रिया अघि बढाईएको पनि आयुक्तको कार्यालयले बताएको छ।
