काठमाडौं । तीन कम्पनीहरूले वार्षिक साधारण सभाबाट पारित भएको बोनस शेयर आफ्ना शेयरधनीको हितग्राही खातामा जम्मा गरिदिएका छन् । शाइन रेसुङ्गा डेभलपमेन्ट बैंक, सिटिजन लाइफ र नेपाल इन्स्योरेन्सले सम्बन्धित शेयरधनीको हितग्राही खातामा बोनस शेयर जम्मा गरिदिएका हुन् ।
सिटिजन लाइफ इन्स्योरेन्स कम्पनीको गत माघ १४ गते सम्पन्न ७ औं वार्षिक साधारण सभाले पारित गरेको ५ प्रतिशत बोनस शेयर पुस २६ गतेसम्म कायम शेयरधनीको डिम्याट खातामा जम्मा गरिएको जनाएको छ । सो सभाले शून्य दशमलव २६३२ प्रतिशत नगद लाभांश पारित गरेको थियो ।
त्यस्तै नेपाल इन्स्योरेन्स कम्पनीले पनि पुस १३ गते सम्पन्न ७५ औं वार्षिक साधारण सभाले पारित गरेको १० प्रतिशत बोनस शेयर मंसिर २७ गतेसम्म कायम शेयरधनीको डिम्याट खातामा जम्मा गरिदिएको हो । सो सभाले कर प्रयोजनको लागि शून्य दशमलव ५२६३ प्रतिशत नगद लाभांश पारित गरेको थियो ।
त्यसैगरी, शाइन रेसुङ्गा डेभलपमेन्ट बैंकको मंसिर २३ गते सम्पन्न १५ औं वार्षिक साधारण सभाले पारित गरेको १० दशमलव ५० प्रतिशत बोनस शेयर मंसिर १० गतेसम्म कायम शेयरधनीको डिम्याट खातामा जम्मा गरिदिएको हो । सो सभाले कर प्रयोजनको लागि शून्य दशमलव ५५ प्रतिशत नगद लाभांश पारित गरेको थियो ।
साथै, हालसम्म पनि शेयर अभौतिकीकरण नगराएका शेयरधनीको हकमा भने आफ्नो शेयर अभौतिकीकरण गराएपछि बोनस शेयर डिम्याट खातामा जम्मा गराइने कम्पनीले जनाएका छन् ।