लन्डन । बेलायतका प्रधानमन्त्री बोरिस जोनसनले कोरोना भाइरसको नयाँ प्रजातिको सङ्क्रमण पहिलेको भन्दा धेरै खतरनाक भएको बताएका छन् ।
पछिल्लो समयमा बेलायतमा कोरोना भाइरसका सङ्क्रमितको सङ्ख्या दिन–प्रतिदिन बढ्दै गएको बताइरहेका बेला प्रधानमन्त्री जोनसनले यस्तो दावी गरेका हुन् ।
प्रधानमन्त्री जोनसनले भनेका छन्– यो भाइरस पहिलेको भन्दा धेरै नै खतरा छ । त्यसैले सबै नागरिकले पहिलेको भन्दा पनि अझ बढी सुरक्षा मापदण्ड अपनाउनुपर्ने हुन्छ ।
शुक्रबार डाउनिङ स्ट्रिटमा आयोजित पत्रकार सम्मेलनका क्रममा उनले यस्तो अभिव्यक्ति दिएका हुन् । उनले यो भाइरस पहिलो पटक गत महिना मात्र इङ्गल्यान्डको केन्टमा देखिएको बताए ।
उनले सो पत्रकार सम्मेलनमा भने– यो नयाँ प्रजातिको भाइरस पुरानो भन्दा कम्तीमा पनि ७० प्रतिशत बढी मात्रामा सङ्क्रमण फैलिने खालको रहेको छ ।
पछिल्लो समयमा निकै सङ्क्रामक बन्दै गएको बेलायतमा कोरोना भाइरसको सङ्क्रमणबाट एकैदिनमा १ हजार ८२० जनाको मृत्यु भएको समाचारमा जनाइएको थियो ।
बेलायतका स्वास्थ्य अधिकारीहरूले गएको बुधबार मात्र यहाँ त्यति धेरै नागरिकको ज्यान कोरोना भाइरसको सङमणबाट भएको जानकारी दिएका थिए ।
बेलायतका स्वास्थ्यसम्बन्धी अधिकारीहरूले बेलायतमा कोरोना भाइरसको सङ्क्रमण सुरु भएदेखि अहिलेका केही हप्तायता धेरै जनाको ज्यान जान थालेको बताउने गरेका छन् ।
बेलायतको स्वास्थ्य मन्त्रालयका अधिकारीले पनि यो सङ्क्रमण पुरानोभन्दा खतरनाक भएको प्रमाण मिलेको बताएका छन् ।
उनीहरूका अनुसार कोरोना भाइरसको पहिलेको सङ्क्रमणमा १ हजार जना सङ्क्रमितमा १० जनाको ज्यान गएको पाइएको थियो भने यो नयाँ प्रजातिको सङ्क्रमणमा भने एक हजार जना सङ्क्रमितमा १३ वा १४ जनाको नै निधन भएको पाइएको छ ।
बेलायतमा कम्तीमा पनि ३८ हजार नागरिक सङ्क्रमित भएर अस्पतालमा रहेका छन् । याँ प्रजातिको भाइरस बेलायतमा प्रवेश गरेपछि यसले पहिलेको भन्दा पनि धेरै मानिसलाई सङ्क्रमित बनाएको छ ।
बेलायतमा कोरोनाको पहिलो वेभ आएको थियो । सो वेभका बेलामा भन्दा यस पटकको यो नयाँ सक्रमणले गर्दा कम्तीमा पनि ७८ प्रतिशत बढी मात्रामा नागरिकलाई सङ्क्रमित तुल्याएको छ । (रासस/सिन्ह्वा)
