काठमाडौं (अस) । जनउत्थान सामुदायिक लघुवित्त वित्तीय संस्थाको १० औं वार्षिक साधारणसभा सञ्चालक समितिका अध्यक्ष बाबुराम विश्वकर्माको अध्यक्षतामा सम्पन्न भएको छ ।
रूपन्देहीको बुटवल उपमहानगर वडा–९ कालिकापथस्थित होटल न्यू इरामा आयोजित साधारणसभा कोरोना महामारीका कारण स्वास्थ्य सुरक्षा अपनाएर न्यून संख्यामा भौतिक उपस्थिति र भर्चुअल माध्यमबाट शेयरधनीलाई सहभागी गराएर सम्पन्न भएको हो ।
कार्यक्रममा संस्थाका संस्थापक अध्यक्ष डा. मानबहादुर बिकेले कोरोनाको विषम परिस्थितिमा संस्थालाई परेको प्रभाव न्यूनीकरण गर्न नयाँ रणनीति तयार गरेर अगाडि बढ्न सुझाए । साधारणसभाले सञ्चालक समितिको तर्फबाट अध्यक्षद्वारा प्रस्तुत वार्षिक प्रतिवेदनसहित आव ०७६÷७७ को वासलात, नाफा–नोक्सान हिसाब र नगद प्रवाह विवरणलगायत पारित गरेको छ ।
आव ०७६/७७ को मुनाफाबाट हाल कायम रहेको चुक्ता पुँजी ७ करोड ९२ लाखको २.६० प्रतिशतले हुन आउने रकम नगद लाभांश कर प्रयोजनका लागि वितरण गर्ने, आव ०७६/७७ को असार मसान्तमा कायम चुक्ता पुँजी ७ करोड ९२ लाखको ४९.४० प्रतिशतले हुने रकम ३ करोड ९१ लख २४ हजार ८०० बरावरको बोनस शेयर जारी गर्ने निर्णय साधारणसभाले पारित गरेको संस्थाका प्रमुख कार्यकारी अधिकृत÷कम्पनी सचिव श्रीराम पोख्रेलले बताए ।
यस्तै, संस्थाको अधिकृत पुँजी १५ करोडबाट वृद्धि गरी ५० करोड पु¥याउने, राष्ट्र बैंकबाट स्वीकृत लिई संस्थाको कार्यक्षेत्र १९ जिल्लाबाट विस्तार गरी राष्ट्रिय स्तरमा स्तरोन्नति गर्नेलगायत निर्णय सर्वसम्मत पारित भएको संस्थाका अध्यक्ष बाबुराम विश्वकर्माले जानकारी दिए ।
