फागुन ८, काठमाडौ। गुणस्तर कम्जोर भएको भन्दै आलोचना भइरहने नेपालका टेलिकम कम्पनीहरुमा वास्तविकतामै गुणस्तर कम्जोर भएको पाईएको छ । नियामक निकाय नेपाल दूरसञ्चार प्राधिकरणले गरेको गुणस्तर परीक्षणमा नेपालमा टेलिफोन सेवाको गूणस्तर कम्जोर भएको देखिएको हो ।
प्राधिकरणले सार्वजनिक गरेको परीक्षण प्रतिवेदन अनूसार सेवा प्रदायकको भ्वाईस कलको गुणस्तर तोकिएको भन्दा कम्जोर भएको पाईएको छ। गुणस्तर परीक्षणमा नेपालका ३ टेलिकम कम्पनीको गूणस्तर तोकिए बमोजिम नभएको पाईएको हो।
प्राधिकरणले पुस १६ गते देखि २७ गतेसम्म गरेको परीक्षणमा नेपालमा सञ्चालित तीन टेलिकम कम्पनी एनसेल, स्मार्ट र नेपाल टेलिकमको कल सेटअप टाइमको मापदण्ड पूरा गर्न असफल देखिएका छन् । प्राधिकरणले तीन वटै कम्पनीको कल सेटअप रेट, कलड्रप रेट र ब्लक रेट परीक्षण गरेको थियो।
कल सेटअप रेट ९९.९९ प्रतिशत भन्दा माथि हुनुपर्ने, कल सेटअप टाइम ५ सेकण्ड वा सो भन्दा कम हुनुपर्ने, कल ब्लक रेट दुई प्रतिशत वा सो भन्दा कम हुनपर्ने, कल ड्रप (कुरा गर्दागर्दै फोन काटिने) रेट दुई प्रतिशत वा सो भन्दा कम हुने पर्ने प्राधिकरणले तोकेको मापदण्ड छ। तर कुनै पनि टेलिकम कम्पनीले पूर्ण गुणस्तर कायम गरेको नपाईएको प्रतिवेदनले देखाएको छ।
औसतमा एनसेल कल ड्रप रेटमा १.१८ प्रतिशतका साथ २ प्रतिशतको मापदण्ड कायम राख्न सफल भएको छ । तर, अन्य इन्डिकेटरमा भने कुनै पनि सेवा प्रदायकले मापदण्ड पूरा गर्न सकेका छैनन् । त्यस्तै स्मार्ट टेलिकमको भने सबै भन्दा कम्जोर गुणस्तर भएको देखिएको छ।
दश दिन सम्म गरिएको परिक्षणमा भिन्न स्थानमा भिन्न भिन्न नतिजा आएको छ तर समग्रमा भने कुनैपनि टेलिकम कम्पनीले मापदण्ड अनुसार पूर्ण गुणस्तर कायम नगरेको पाईएको हो।
नयाँ बानेश्वर, शंखमूल, ग्वार्को, इमाडोल, लुभु र लामाटारमा भएको परीक्षणमा कल सेटअप रेट, कल सेटअप टाईम र कल ब्लक रेट परिक्षणमा सबै कम्पनीले मापदण्ड पुरा नगरेको पाईएको छ।
इमाडोल, ग्वार्को, सातदोबाटो, एकान्तकुना, धोबीघाट, बल्खु, कलंकी, स्वयम्भू, बनस्थली, नयाँ बजार, सोह्रखुट्टे र ठमेल क्षेत्रमा भएको परीक्षणमा भने नेपाल टेलिकमको कल ड्रप रेट राम्रो पाईएको छ। तर कल सेटअप रेट, कल सेटअप टाईम र कल ब्लक रेट परिक्षणमा सबै कम्पनीले मापदण्ड पुरा नगरेको पाईएको थियो ।
जमल, ज्ञानेश्वर, गौशला, गौरीघाट, चाबहिल, एयरपोर्ट, सिनामंगल, कोटेश्वर, बालकुमारी र ग्वार्कोमा मोबाइल सेवाको गुणस्तर परीक्षण गरिएको थियो । मित्रपार्क, टुसाल, कुमारीगाल, बौद्ध, चाबहिल, धुम्बाराही, कपन, गोल्फुटार, बुढानीलकण्ठ, पासीकोट, हात्तीगौंडा, नारायणगोपाल चोक, महाराजगञ्ज, लाजिम्पाट र लैनचौरमा गरिएको गुणस्तर परीक्षणमा नेपाल टेलिकमको गुणस्तर भने कम्जोर देखिएको छ । यो क्षेत्रमा कल ड्रप रेटमा एनसेल र स्मार्टसेलले गुणस्तर कायम गरेको पाईएको थियो ।
सातदोबाटो, नागपोखरी, कुसुन्ती, एकान्तकुना, झम्सिखेल, सानेपा, कुपण्डोल, त्रिपुरेश्वर र जमलमा कल ड्रप रेटमा एनसेल बाहेक सबै मोबाइल सेवाप्रदायक असफल देखिएका छन् ।
कोटेश्वर, पुरानो सिनामङ्गल, चाबहिल, सुन्दर टोल, बौद्ध, जोरपाटी, थली, कपन र धुम्बाराहीमा भएको परीक्षणमा कुनै पनि सेवाप्रदायकको गूणस्तर पुरा भएको पाईएन।
बुंगमती, च्यासिकोट, भैँसेपाटी, नख्खु, एकान्तकुना, जावलाखेल, कुपण्डोल, त्रिपुरेश्वर र जमलमा परीक्षण हुँदा कल सेटअप र कल ब्लक रेटमा नेपाल टेलिकम, कल ड्रप रेटमा एनसेल सक्षम देखिए।
त्यस्तै सिंहदरबार, नयाँ बानेश्वर, मिलनचोक, भिमसेनगोला, गौशला, गैरीघाट, पुरानो सिनामंगल, पेप्सीकोला, कोटेश्वर र ग्वार्कोमा गुणस्तर परीक्षण गरिएको थियो । उक्त परीक्षणमा कल ड्रप रेटमा नेपाल टेलिकम मात्र सफल भएको छ । अन्यमा सबै सेवा प्रदायक कम्जोर देखिएका छन् ।
सीतापाइला, रामकोट र कलङ्कीमा भएको परीक्षणमा कल ड्रप रेटमा सबै सेवा प्रदायक सफल भए पनि कल सेटअप रेट, र ब्लक रेटमा सबै कम्जोर देखिएका छन्। ठमेल, सामाखुसी, गोंगवु, धापासी, माहांकाल, गोल्फुटार र बरफेदीमा भएको परीक्षणमा एनसेल मात्र कल ड्रप रेटमा सफल भएको छ।
