फागुन २४, पर्वत । पर्वतको कुश्मा नगरपालिका ५ चाक्लेको डीलमा सिसाको पुल बनेको छ ।
पर्यटक आकर्षित गर्ने उद्धेश्यले जिपलाइन सञ्चालन गरिरहेको हार्नेस कम्पनीले सिसाको पुल निर्माण गरेको हो । कालीगण्डकी नदीमाथिको भीरमा बनेको सिसाको पुल खोला वा नदी तर्न भने बनाइएको होइन । साहसिक पर्यटनमा रमाउनेका लागि पुल बनाइएको हार्नेस कम्पनीका निर्देशक राजकुमार बस्नेतले जानकारी दिए ।
उक्त पुलको राष्ट्रिय सभाका अध्यक्ष गणेश तिमिल्सिनाले सोमवार उद्घाटन गरे । उनले पर्वतमा निजी क्षेत्रले पर्यटनमा ठूलो लगानी गरेको बताउँदै राज्यले पनि प्रोत्साहन गर्ने बताए । पर्वत जिल्ला पर्यटनको हब बन्दै गएकोमा तिमिल्सिनाले खुशी व्यक्त गरे ।
कालीगण्डकी नदीको सतहदेखि झन्डै २५० मिटरको उचाइमा रहेको पुलबाट नदी र भीरको दृश्य छर्लङ देखिन्छ । तल हेरेर डर र आनन्द दुबै लिन सक्ने गरि पुल बनेको छ । एकैपटकमा १०० जनासम्मले स्काइब्रिजको मज्जा लिन सक्ने बस्नेतले जानकारी दिए ।
पुल ३५ फिट लामो र ११ फिट चौंडाइ छ । ‘सिसाको पुल नेपालको लागि पहिलो पुल हो’, उनले भने, ‘अहिले युवाहरुको आकर्षण टिकटकमा भएका कारण यसले युवायुवतीलाई आकर्षित गर्ने विश्वास लिएका छौ ।’ अहिले निर्माण भएको छोटो स्काइब्रिजको सफलता र प्राविधिक पक्ष हेरेर भविष्यमा विश्वकै लामो सिसाको पुल बनाउने योजना रहेको कम्पनीका निर्देशक बस्नेतले बताए ।
स्काइब्रिज विश्वकै दोस्रो लामो सुपरम्यान जीपलाइन र विश्वकै दोस्रो अग्लो बञ्जी तथा विश्वकै अग्लो स्विङसँगै छ ।
उक्त कम्पनीले कुस्माबजारमा नै पहिलो पटक ज्वाइन्ट स्विङ पनि सञ्चालनमा ल्याएको छ । आइतवारदेखि सञ्चालनमा आएको स्विङमा पहिलो दिनमा नै २० ओटा जोडीले मज्जा लिएको सञ्चालक सुनिल बानियाँले जानकारी दिए ।
कम्पनीले यसअघि विश्वकै दोस्रो लामो सुपरम्यान जीपलाइन पनि सञ्चालनमा ल्याएको छ । अहिले जीपलाइनमा बालबच्चादेखि ८० वर्षे वृद्धसम्मको आकर्षण छ । पोखरा र अन्य ठाउँहरुबाट पनि धेरै पर्यटकले जिपलाइनमा आउने इच्छा राख्दै समय बुक गराउने क्रम बढिरहेको प्रबन्ध निर्देशक बानियाँले बताए ।
जिपलाइनका लागि ३ हजार ५०० रुपैयाँ शुल्क तोकिएको छ ।