विराटनगर। वैदेशिक रोजगारीका कारण गाउँघर नै रित्तिने अवस्था आएकाले अब बाहिर जाने जनशक्तिलाई यहीँ रोक्नुपर्ने राष्ट्रपति रामचन्द्र पौडेलले बताउनुभएको छ । यसका लागि स्वदेशमै रोजगारी सृजना हुनुपर्ने भएकाले कृषि, वन र खनिजमा आधारित उद्योग खुल्नुपर्ने उहाँले बताउनुभयो ।
विराटनगरमा नेपाल उद्योग परिसंघ, कोशी प्रदेश समितिले आयोजना गरेको सम्मान कार्यक्रममा राष्ट्रपति पौडेलले स्वदेशमै सम्मानजनक रोजगारी र आम्दानीको सृजना नहुँदा जनशक्ति विदेशिने क्रम बढेको बताउनुभयो । ‘यो स्थिति रोक्न कृषि, वन र खनिजमा आधारित उद्योगको व्यापक विस्तार गर्नुपर्छ,’ उहाँले भन्नुभयो ।
कोभिड–१९ पछि शिथिल भएको अर्थतन्त्रको पुनरुत्थान गर्न सरकारले चालेका कदमले केही सकारात्मक प्रभाव परेको राष्ट्रपति पौडेलले बताउनुभयो । नेपालमा कृषि क्षेत्रको रूपान्तरण तथा उद्योग व्यवसायको विस्तार गरी उत्पादन वृद्धि, रोजगारी सृजना, निर्यात प्रवर्द्धन र आयात प्रतिस्थापन गर्नुपर्नेमा उहाँले जोड दिनुभयो । अर्थतन्त्रलाई आत्मनिर्भर बनाउन तथा निरपेक्ष गरीबी निवारण गरी आर्थिक विकास गर्न सरकार एक्लैले सक्ने अवस्था नरहेकाले निजीक्षेत्रसँग सरकारले साझेदारी गरेमा मात्र सम्भव हुने उहाँले बताउनुभयो । यसका लागि सार्वजनिक–निजी साझेदारीलाई थप व्यापक र प्रभावकारी बनाउनुपर्ने उनको भनाइ थियो ।
