काठमाडौं (अस) । बैंकिङ फाइनान्स एन्ड इन्स्योरेन्स इन्स्टिच्युट अफ नेपाल (बिफिन) ले नेतृत्व विकाससम्बन्धी अन्तर्राष्ट्रिय सम्मेलन शनिबार आयोजना गरेको छ । सम्मेलन उद्घाटन राष्ट्र बैंकका गभर्नर महाप्रसाद अधिकारीले गरे ।
काठमाडौंमा आयोजित एकदिने सम्मेलनमा बैंक तथा वित्तीय संस्थाका सञ्चालक, प्रमुख कार्यकारी अधिकृत, उच्च सरकारी अधिकारी, औद्योगिक तथा व्यावसायिक क्षेत्रका प्रतिष्ठित व्यक्ति एवं पेसागत संघ–संस्थाका प्रतिनिधिले सहभागिता जनाएका थिए । सम्मेलनमा नेपाल, भारत, बंगलादेश तथा श्रीलंकाका सम्बन्धित क्षेत्रका विज्ञबाट ज्ञान साटासाट गरिएको थियो ।
सम्मेलनमा भारतीय रिजर्व बैंकका पूर्वगभर्नर डा. दुभुरी सुब्बाराव, बंगलादेश बैंकका पूर्वगर्भनर डा. अतिउर रहमान, नेपाल राष्ट्र बैंकका पूर्वगभर्नर डा. चिरञ्जीवी नेपाल, राष्ट्र बैंकका डेपुटी गभर्नरद्वय डा. निलम ढुंगाना तिम्सिना र बमबहादुर मिश्रको सहभागिता थियो ।
सम्मेलन आयोजना गर्नुको उद्देश्य सबै तह र क्षेत्रका संस्थाका लागि विद्युतीय कारोबारलाई प्रोत्साहन गर्नु रहेको बिफिनले बताएको छ । विद्युतीय क्रान्तिमा प्रवेश गर्न बृहत् लगानी, नयाँ सीप तथा क्षमता, नयाँ नियमनकारी व्यवस्था र जटिलताको समाधान गर्न सक्ने सक्षम नेतृत्वको खाँचोलगायत विषयमा सहभागीले आ–आफ्ना धारणा व्यक्त गरे । सम्मेलनबाट बैंकिङ सेवाको भविष्यको सम्भावना, वस्तु तथा सेवा प्रवाहमा प्रविधि प्रयोग, वित्तीय क्षेत्रमा देखापर्ने अपराध तथा सुरक्षासम्बन्धी जोखिम सामना गर्न मद्दत पुग्ने अपेक्षा गरिएको छ ।
सम्मेलनको मुख्य प्रायोजक राष्ट्रिय वाणिज्य बैंक र भिक्टोरिया युनिभर्सिटी अफ मेलबर्न, अस्ट्रेलिया, सह–प्रायोजकमा एनआईसी एशिया बैंक र पारामाउन्ट मोटर्स प्रालि रहेका थिए । यस्तै, अन्य प्रायोजकमा नेपाल बंगलादेश बैंक, एनसीसी, सेन्चुरी कमर्सियल, महालक्ष्मी विकास बैंक, हिमालयन बैंक, एभरेष्ट बैंक, ज्योति लाइफ इन्स्योरेन्स, कृषि विकास बैंकलगायत रहेका थिए ।
