बागलुङ । अचेल विद्यालयको पठनपाठन प्रविधिको प्रयोगबाट सञ्चालन गर्ने चलन बढेको छ । कुनै समय खरिपाटीमा पढाउने शिक्षक अहिले ल्यापटपमा शैक्षिक सामग्री राखेर स्मार्ट टेलिभिजनबाट श्रव्यदृश्य सामग्री देखाएर पढाउन सक्ने भएका छन् । बागलुङ नगरपालिका–९ स्थित सिगाना माध्यमिक विद्यालय तित्याङमा गतवर्षदेखि प्रत्येक कक्षा कोठामा स्मार्ट टिभी जडान गरेर ल्यापटपको माध्यमबाट शिक्षण सिकाइ थालिएको थियो ।
यस वर्ष सिगाना माध्यमिक विद्यालय लामिचौरमा समेत प्रविधिको माध्यमबाट शिक्षण सिकाइ थालिएको छ । नगरपालिकाको आर्थिक सहयोगमा विद्यालका सबै कक्षा कोठामा स्मार्ट टिभी जडान गरिएको छ भने शिक्षकलाई ल्यापटप प्रदान गरिएको छ । कक्षा ६ देखि १० सम्मका पाँचओटा कक्षा कोठामा ५५ इन्चको स्मार्ट टिभी जडान गरिएको छ । विद्यालयका शिक्षकलाई ल्यापटप वितरण गरिएको छ । शिक्षकले ल्यापटपमा भएको पाठ्य सामग्री स्मार्ट टिभीमा देखाउन सक्नेगरी प्रविधिको विकास गरिएको र विद्युत् नभएको अवस्थामा समेत पढाउन सक्ने व्यवस्था मिलाइएको सिगाना माध्यमिक विद्यालय लामिचौरका प्रधानाध्यापक चन्द्र्र मल्लले बताए । ल्यापटपबाट विद्यार्थी पढाउन शिक्षकले तालीम पनि लिइरहेको उनले जानकारी दिए ।
‘केही शिक्षकले मात्र ल्यापटप चलाउन जान्नुहुन्छ, उहाँहरूले अहिले दिनको एउटा कक्षा प्रविधिको प्रयोगबाट लिइरहनुभएको छ, अन्य शिक्षकले ल्यापटप चलाउन सिक्दै हुनुहुन्छ, एक शिक्षकले अर्को शिक्षकलाई समेत सिकाउनुभएको छ,’ मल्लले भने । कम्तीमा दैनिक दुई पिरियड डिजिटल माध्यमबाट अध्यापन गराउने लक्ष्य राखिएको छ ।
नगरपालिकाको आठ लाख रुपैयाँबाट विद्यालयको सिकाइ योजना प्रविधिमैत्री बनाइएको हो । अहिले ५५ इन्चको पाँचओटा स्मार्ट टिभी र आठओटा ल्यापटप खरीद गरेर विद्यालयमा प्रविधिको माध्यमबाट सिकाइ कार्यको शुभारम्भ गरिएको हो । विद्यार्थीको संख्याभन्दा शैक्षिक गुणस्तर बढाउनेतर्फ विद्यालयको ध्यान गएको विद्यालय व्यवस्थापन समितिका अध्यक्ष टीकाराम थापाले बताए ।
विद्यालयमा हाल एक सय ४६ विद्यार्थी छन् । ‘बसाइँसराइले विद्यार्थी क्रमशः घट्दै छन्, तर हामीले शैक्षिक गुणस्तर भने बढाउँदै लगेका छौं,’ अध्यक्ष थापाले भने । यहाँ अधिकांश दलित समुदायका विद्यार्थी अध्ययनरत छन् । उनीहरूलाई थप आकर्षित गर्न नगरपालिकाको सहयोगमा एक शिक्षक एक ल्यापटप र कक्षाकोठामा स्मार्ट टिभी जडान गरिएको छ । रासस
