असार २६, काठमाडौं । यो साता पनि शेयर बजारमा महत्वपूर्ण सबै परिसूचकहरु नकारात्मक बनेका छन् । गत साताको तुलनामा यो साता पनि नेप्से परिसूचक, कारोबार रकम र कित्तासँगै कुल बजार पूँजीकरणमा कमी आएको हो ।
गत साता स्थिर रही २ हजार ८४३ विन्दुमा रहेको नेप्से परिसूचक यो साता चार कारोबार दिन निरन्तर घट्दा २ हजार ८२५ दशमलव १० विन्दुमा झरेको छ । गत साताभन्दा यो साता नेप्से परिसूचक १७ दशमलव ९० अंक तल झरेको हो । गत साताको अन्तिम कारोबार दिन १९ दशमलव १३ अंक बढेर २ हजार ८४३ विन्दुमा कायम भएको नेप्से परिसूचक साताको पहिलो कारोबार दिनदेखि चार कारोबार दिनसम्म निरन्तर घटेको छ भने अन्तिम कारोबार दिन २३ दशमलव ९७ अंकले बढेको छ ।
यो साता पहिलो कारोबार दिन ८ दशमलव ४८ अंक, दोस्रो दिन ११ दशमलव ७८ अंक, तेस्रो दिन ५ दशमलव २४ अंक र चौथो दिन १६ दशमलव ९७ अंकले घटको हो । समग्र धितोपत्र कारोबार मापक नेप्से परिसूचक घटेपनि ठूला कम्पनीको मात्र कारोबार मापक सेन्सेटिभ इन्डेक्स भने यो साता झिनो अंकले बढेको छ । गत साता ५२८ दशमलव ७१ विन्दुमा रहेको सेन्सेटिभ इन्डेक्स यो साता ५२९ दशमलव ६६ विन्दुमा पुगेको हो ।
बजारमा नकारात्मक असर पर्ने उल्लेखित कारण नभएपनि पछिल्लो समय नियामक निकायको सूचीकृत ५१ कम्पनीप्रतिको धारणा र लकडाउन खुकुलो भएसँगै अन्य व्यापार व्यवसाय सामान्य बन्दा कारोबारमा उत्साह कम देखिएको अनुमान ब्रोकरहरुले गरेका छन् । यो बीचमा कारोबार रकम घटेकाले सस्तोमा भने लगानीकर्ताहरुले शेयर बेच्न चाहेका छैनन् भने किन्ने लगानीकर्ताहरु पनि पर्ख र हेरको अवस्थामा रहेको ब्रोकरहरुको भनाइ छ ।
गत साताभन्दा यो साता कारोबार रकम रू. १० अर्ब ९० करोड ४४ लाख ८२ हजार कम भएको छ । गत साता रू. ३४ अर्ब १६ करोड ५६ लाख ३४ हजार बराबरको शेयर कारोबार भएकोमा यो साता रू. २३ अर्ब २६ करोड ११ लाख ५१ हजार बराबरको मात्र शेयर कारोबार भएको हो । कारोबार रकम घटेसँगै कारोबार कित्ता पनि यो साता ४ करोड ७५ लाख ४० हजार १५३ कित्ता कम कारोबार भएको छ ।
गत साता १० करोड ३३ लाख ८८ हजार ६६६ कित्ता शेयर कारोबार भएकोमा यो साता ५ करोड ५८ लाख ४८ हजार ५१३ कित्ता मात्र शेयर कारोबार भएको छ । यो साता लगानीकर्ताहरुको सम्पत्तिको मूल्य रू. १९ अर्ब ७५ करोड ६० लाख १२ हजारले घटेको छ । गत साताको अन्तिम कारोबार दिन रू. ३९ खर्ब ४९ अर्ब ६१ करोड ७० लाख ५६ हजार रहेको कुल बजार पूँजीकरण रकम यो साताको अन्तिम कारोबार दिन रू. ३९ खर्ब २९ अर्ब ८६ करोड १० लाख ४४ हजार कायम भएको छ ।
यो साता जलविद्युत् समूहका लगानीकर्ताहरुले सर्वाधिक गुमाएका छन् । जलविद्युत् समूहको परिसूचक यो साता गत साताभन्दा ३ दशमलव ९५ प्रतिशत घटेको हो । गत साता २ हजार ८४० दशमलव ४१ विन्दुमा रहेको जलविद्युत् समूहको परिसूचक यो साता २ हजार ७२८ दशमलव शून्य ८ विन्दुमा झरेको छ ।
गत साताभन्दा यो साता उत्पादन तथा प्रशोधन समूहको परिसूचक सर्वाधिक बढेको छ । उत्पादन तथा प्रशोधन समूहको परिसूचक ५ हजार ९६४ दशमलव १० विन्दुदेखि २ दशमलव ७० प्रतिशत वृद्धि भई ६ हजार १२५ दशमलव ३८ विन्दुमा पुगेको हो । त्यस्तै यो साता व्यापारिक समूहको १ दशमलव १४ प्रतिशत, बैंकिङको शून्य दशमलव २३ प्रतिशत, लघुवित्तको शून्य दशमलव ५७ प्रतिशत र म्युचुअल फण्डको शून्य दशमलव ३८ प्रतिशत वृद्धि भएको छ ।
यो साता जलविद्युत् समूहसँगै होटल्स तथा पर्यटन समूहको परिसूचक १ दशमलव ६६ प्रतिशत, विकास बैंकको १ दशमलव ११ प्रतिशत, वित्तको २ दशमलव ७८ प्रतिशत, निर्जीवन बीमाको १ दशमलव ६७ प्रतिशत, अन्यको शून्य दशमलव ५६ प्रतिशत, जीवन बीमाको १ दशमलव २२ प्रतिशत र लगानी समूहको १ दशमलव ७४ प्रतिशत परिसूचक घटेको छ ।
गत साता र यो साता तुलनात्मक रुपमा बजारका सूचकहरु :
स्रोत : नेपाल स्टक एक्सचेञ्ज (नेप्से)
यो साता समूहगत परिसूचकमा भएको थपघटको अवस्था :
स्रोत : नेपाल स्टक एक्सचेञ्ज (नेप्से)
