६ अर्बभन्दा बढी बीमाशुल्क आर्जन गरेको राष्ट्रिय बीमा संस्थानको नाफा ३ करोडभन्दा बढी

फागुन १, काठमाडौं । चालू आर्थिक वर्षको दोस्रो त्रैमाससम्म राष्ट्रिय बीमा संस्थानले रू. ६ अर्ब ४ करोड ६९ लाखभन्दा बढी खुद बीमाशुल्क आर्जन गरेको छ ।  गत वर्षको तुलनामा यस वर्ष कम्पनीको खुद बीमाशुल्क आर्जन रू. ५ अर्ब ६८ करोड २५ लाखभन्दा बढी थियो । यस वर्ष कम्पनीको खुद बीमाशुल्क आर्जन रकम ६ दशमलव ४१ प्रतिशत बढी भएको हो । खुद दाबी भुक्तानी रकम कम्पनीको ३९ दशमलव ४३ प्रतिशत वृद्धि भएको छ ।  गत वर्ष रू. १ अर्ब ४४ करोडभन्दा बढी खुद दाबी भुक्तानी गरेको कम्पनीले यस वर्ष रू. २ अर्ब १ करोडभन्दा बढी खुद दाबी भुक्तानी गरेको हो । दोस्रो त्रैमाससम्म कम्पनीले रू. ३ करोडभन्दा बढी खुद नाफा गरेको छ ।  गत वर्षभन्दा यस वर्ष कम्पनीले १२ दशमलव १४ प्रतिशत बढी खुद नाफा गरेको हो । गत वर्ष यस अवधिसम्म कम्पनीले रू. २ करोड ६७ लाखभन्दा बढी खुद नाफा गरेको थियो ।  कम्पनीले यस वर्ष १५ दशमलव ७३ प्रतिशत बढी रू. ४ करोड ४६ लाख आम्दानी गरेको छ भने २३ दशमलव ९० प्रतिशत बढी रू. १ करोड ४६ लाख खर्च गरेको छ ।  हाल कम्पनीको चुक्तापूँजी रू. १८ करोड १० लाख २० हजार छ । कम्पनीले बीमा समितिले तोके बमोजिमको रू. २ अर्ब चुक्तापूँजी कायम गर्न आईपीओ र हकप्रद शेयर निष्कासन सहितको योजना अघि सारेको छ ।  हालसम्म कम्पनीको उक्त योजना भने अन्योल रहेको छ । यसवर्ष कम्पनीको जगेडा कोष रकम २४ दशमलव शून्य ५ प्रतिशत वृद्धि भई रू. ३८ करोड ७८ लाखभन्दा बढी कायम भएको छ ।  जीवन बीमा कोष रकम गत वर्षभन्दा २० दशमलव २५ प्रतिशत बढेर रू. ३८ अर्ब १४ करोड ४४ लाख पुगेको छ ।