जेठ ४, काठमाडौं । नेपाल राष्ट्र बैंकले बिहीवार १० अर्ब रुपैयाँ बराबरको विकास ऋणपत्र विक्री गर्ने भएको छ ।
विकास ऋणपत्र २०८१ ‘ङ’ नाम दिइएको उक्त ऋणपत्रको परिपक्व अवधि दुई वर्षको छ । उक्त ऋण पत्रमा वार्षिक १० प्रतिशतका दरले ब्याज पाइने केन्द्रीय बैंकले बताएको छ ।
जेठ र असार महीनामा १ खर्ब रुपैयाँभन्दा केही बढी आन्तरिक ऋण संकलन गर्ने क्रममा बिहीवारदेखि राष्ट्र बैंकले १० अर्ब रुपैयाँको विकास ऋणपत्र विक्री गर्न लागेको हो । ऋणपत्र नेपाली नागरिक, बैंक तथा वित्तीय संस्था, बीमा कम्पनी र अन्य संगठित संघ संस्थाले खरीद गर्न पाउने छन् ।
उक्त ऋणपत्र धितो राखेर ऋण लिन र दिन पाइन्छ । ६/ ६ महीनामा ब्याज पाइने उक्त ऋणपत्र खरीदका लागि अनलाइनबाटै आवेदन दिन सकिने केन्द्रीय बैंकले जारी गरेको सूचनामा उल्लेख छ ।
ऋणपत्र घटीमा ५० हजार रुपैयाँ र बढीमा कुल निस्कासन रकमको सीमामा नबढाई ५० हजारले भाग गर्दा निशेष भागजाने अंकमा हुनुपर्ने सूचनामा उल्लेख छ । बिहीवार बोलकबोल संकलन गरेर जेठ ६ गते ऋणपत्र निस्कासन गरिने राष्ट्र बैंकले बताएको छ ।
