फेसबुक पेजमा ‘जव भ्याकेन्सी’को विज्ञापन राखेर ४३ जनालाई ठगी

काठमाडौं । प्रहरीले फेसबुक पेजमा जव भ्याकेन्सीको विज्ञापन राखेर ठगी गर्ने एक व्यक्तिलाई पक्राउ गरेको छ । पक्राउ पर्नेमा दोलखाको जिरी नगरपालिका–८ घर भई हाल काठमाडौंको काडाँघारी बस्ने २३ वर्षीय शिब खड्का रहेका छन् । उनले सामाजिक संजाल फेसबुकमा ‘जव भ्याकेन्सी’को पेज बनाई बेरोजगार युवाहरुलाई आकर्षित गरी आकर्षक तलब, सुविधा दिने झुठो आश्वासन दिलाई ठगी गर्ने गरेको प्रहरीले जनाएको छ । खड्काले रोजगारीका लागि सुरुमा एक हजार पाँच सयदेखि तीन हजार पाँच सयसम्म इसेवामार्फत डिपोजिट गर्नुपर्छ भनी ४३ जना युवाहरुबाट रकम ठगी गरेको अनुसन्धानमा खुलेको छ । ठगी गरेर फरार रहेका खड्कालाई महानगरीय अपराध महाशाखाको टोलिले पक्राउ गरी आवश्यक कारवाहीको लागी महानगरीय प्रहरी परिसर ललितपुर पठाएको छ । साथै, यस्ता व्यक्तिहरुसँग सचेत रहन पनि प्रहरीले आग्रह गरेको छ ।