काठमाडौं । चीनले पाकिस्तानलाई ७० करोड डलर दिने भएको छ । बहुपक्षीय कर्जादाता निकाय अन्तरराष्ट्रिय मुद्रा कोष (आईएमएफको ७ अर्ब डलर बराबरको वित्तीय उद्धारअन्तर्गत रोकिएको किस्ता जारी गर्न आईएमएफले तोकेको पूर्व शर्तहरू पूरा भएकै समयमा अर्थमन्त्री इशाक दारले यस्तो बताएका हुन् ।
दारले बताएअनुसार चाइना विकास बैंक (सीडीबी) को सञ्चालक समितिले पाकिस्तानका लागि ७० करोड डलरको कर्जा सुविधा पारित गरेको छ । विदेशी मुद्राको चरम अभाव भोगिरहेको पाकिस्तानका लागि अन्य बहुपक्षीय कर्जादाता निकाय र मित्र देशहरूबाट डलर आप्रवाह सहज बनाउने आशामा सीडीबीले सो कर्जा सुविधा पारित गरेको बताइएको छ ।
सो रकम यही हप्ता पाइने आशा गरिएको दारको भनाइ छ । यसले पाकिस्तानको केन्द्रीय बैंक स्टेट बैंक अफ पाकिस्तान (सीबीपी) को विदेशी विनिमय भण्डार बढाउनेछ । हप्तौंदेखि आयात नियन्त्रण गर्दा गर्दै पनि पाकिस्तानको विदेशी विनमिय सञ्चिति घटेर ३ अर्ब डलरमा आएको छ ।
यसले १६/१७ दिनको आयात मात्रै धान्न पुग्छ । दुई महीनासम्मको आयात धान्नका लागि पाकिस्तानले आफ्नो विदेशी विनिमय सञ्चिति बढाएर १० अर्ब डलरमा पुर्याउन जरुरी छ । पाकिस्तानले आईएमएपसँग किस्ता प्रवाहका लागि कर्मचारी स्तरको सम्झौता गरेपछि चीन, साउदी अरब र संयुक्त अरब इमिरेट्सबाट छिट्टै नै डलर प्रवाह हुने पाकिस्तानको आशा छ ।
कोष र पाकिस्तानले फेब्रुअरी २८ मा सो समझौतामा हस्ताक्षर गर्ने बताइएको छ । यो लगत्तै मार्चको पहिाले हप्तामा कोषको कार्यकारी सञ्चालक समतिको बैठक बस्ने आशा गरिएको छ । कोषले राखेको अन्तिम शर्त पूरा गर्न प्रधानमन्त्रीको सचिवालयले राष्ट्रपतिको सचिवालयमा अनुमोदनका लागि बुधबार साँझ नै वित्त (पूरक) विधेयक २०२३ पठाएका थिए ।
तर राष्ट्रिय सभाले बिधेयक पारित गरेको २ दिन ढिला गरेर मात्रै विधेयक राष्ट्रपतिको सचिवालयमा पठाइएको छ । संविधानअनुसार राष्ट्रपतिसँग वित्त विधेयकलाई खारेज गर्ने वा विरोध गर्ने शक्ति छैन । विधेयक पठाएपछि राष्ट्रपतिले केही दिनमै यसमा हस्ताक्षर गरेर यसलाई संसदमा पठाउनुपर्छ । -एजेन्सी
