म्याग्दी । भेटेरिनरी अस्पताल तथा पशु सेवा विज्ञ केन्द्र म्याग्दीले चालू आर्थिक वर्ष २०७८/७९ मा तीनओटा कार्यक्रम मार्फत ५१ ओटा पशुपक्षी फार्मलाई अनुदान उपलब्ध गराउने भएको छ । साना पशुपक्षी तथा मत्स्य व्यवसाय फार्म विस्तार तथा स्थापना गर्न ४०, नयाँ मत्स्य पोखरी निर्माणका लागि ७ र माछा मासु तथा डेरी पसल निर्माण सुधारका लागि चारओटा फार्म छनोट भएका हुन् । केन्द्रबाट उनीहरूले रू. ५८ लाख ५० हजार अनुदान पाउने भएका छन् ।
केन्द्रका सूचना अधिकारी तथा पशु सेवा प्राविधिक सुभास रेग्मीले छनौट भएका ५१ ओटा फार्मका सञ्चालकसँग अनुदान उपलब्ध गराउने सम्झौता गरिसकेको जानकारी दिए । ‘सार्वजनिक सूचना जारी गरेर प्राप्त भएको आवेदनको स्थलगत मूल्यांकन गरेर कार्यविधि अनुसार छनोट र सम्झौता गरिएको हो,’ उनले भने, ‘कुल लागतको ५० प्रतिशत अनुदान उपलब्ध गराउने र आधा रकम सञ्चालकले बेहोर्नुपर्ने सम्झौता छ ।’
कुल ५२ लाख ५० हजार बजेट विनियोजन भएको साना पशुपक्षी फार्म विस्तार तथा स्थापना कार्यक्रमका लागि १५८ ओटा आवेदन परेको थियो । रू. २ लाख बजेट विनियोजन भएको नयाँ मत्स्य विकास कार्यक्रम र रू. चार लाख बजेट रहेको माछा मासु तथा डेरी पसल निर्माण सुधार कार्यक्रममा आठ/आठओटा आवेदन परेका थिए ।
बाख्रा, गाईभैंसी, बंगुर, कुखुरापालनका पुराना फार्मको क्षमता विस्तार र नयाँ फार्म स्थापना गर्न एक लाख ३२ हजार २५० का दरले अनुदान पाउने केन्द्रका प्रमुख जीवनप्रसाद आचार्यले बताए । नयाँ मत्स्य पोखरी निर्माणका लागि ५० हजारका दरले र मासु, डेरी पसलले एक लाखका दरले अनुदान पाउने भएका छन् ।
दूध, माछा, अण्डा उत्पादन बढाएर आत्मनिर्भर बनाउने र पशुपालनतर्फ आकर्षण बढाउन गण्डकी प्रदेश सरकारको योजना अनुसार अनुदान दिन लागिएको हो । छनौट भएका सबै फार्मका सञ्चालकलाई अभिमुखीकरण गरिएको थियो । बाँकी कार्यक्रमका लागि पुन: सूचना आह्वान गरिएको केन्द्रले बताएको छ । रासस
