बौद्ध यस्तो पो थियो ? आश्चर्यचकित हुँदै छेउमा भएकी साथीलाई भित्तामा झुन्डिएको तस्बिर देखाउँदै थिइन् एक महिला । उनी थप बोल्नुअघि अर्की साथी गम्भीर भइहालिन्, ‘स्वयम्भू पनि यस्तै पो भए ।’ तीनै जनाको ध्यान त्यही तस्बिरमा । भूकम्पले गजुरविहीन भएको बौद्धको भत्किएको स्वरूप । छेउमा माटो र इँटाका थुप्रा । स्तूपको सेतो रङ धुलो–माटोले ढाकेको छ । प्रार्थना गरिरहेको समूह र बौद्धको भत्किएको स्वरूपलाई सुन्दर ढंगमा एउटै फ्रेममा कैद गरिएको छ । झट्ट हेर्दा लाग्छ, ‘भूकम्पले भत्किएकाहरूका लागि यो समूहले प्रार्थना गर्दै छ ।’