नेटवर्किङ व्यवसाय भन्दै अनलाइन माध्यमबाट ठगी गर्ने २ जना पक्राउ परेका छन् । महानगरीय अपराध महाशाखाको टोलीले उनीहरुलाई पक्राउ गरेको हो ।पक्राउ पर्नेमा काभ्रेको धुलिखेल घर भई चावहिल बस्ने २७ वर्षीय नवराज गौतम र रामेछापको खाँडादेवी गाउँपालिका घर भई बौद्ध बस्ने २५ वर्षीय विनोद महते रहेका छन् । भारतको सिलीगुडीमा इजाजतविना नै सञ्चालनमा रहेको इम्पोरियम मार्केटिङसँग सम्पर्क गरी पिरामिड शैलीमा सदस्य बनाएर रकम पठाउन लगाई ठगी गरेको महाशाखाले जनाएको छ ।उनीहरुले आईएमई र बैंक खातामा १ लाख २० हजार रुपैयाँ पठाउन लगाएर ठगी गरेको देखिएको प्रहरीको भनाई छ ।पक्राउ परेका दुवै जनालाई कारबाहीका लागि वाणिज्य, आपूर्ति तथा उपभोक्ता हित संरक्षण विभागमा पठाएको प्रहरीले जनाएको छ ।
